Coco Gauff chuan tennis huanga inelna sang, Grand Slam lawmman chu tun aia tam zawk ni turin a nawr mek a. Hetiang ngaihdan hi player tha tam takin an nei a, thawm an nei chho mek zel.
Tennis player tha 20 vel chuan thuneitute hnenah lehkha an thawn a, an hming an ziak hlawm a. Tun aia Grand Slam lawmman tisang turin an phut a, player-te hmakhua ngaia hma la tura an duh thu an tar lan bakah hamthatna nasa zawk an duh thu an thlen a. Tournament kalpui dan chungchangah pawh an ngaihdan dah pawimawh lehzual turin thuneitute hi an phut bawk.
March thla khan an lehkha hmasa an thawn a, tun hnaiah khan lehkha dang an thawn leh a, hetah hian inkhelh chawlhsan hnua hamthatna an dawn theih dan tur te, fanau enkawlna a awm theih dan turte an ziak tel a ni.
An lehkhaah hian Grand Slam inelna atanga an pawisa hmuh chu Association of Tennis Professionals (ATP) leh Women’s Tennis Association (WTA) tour vela an sum hmuh aiin a tlem zawk tih tar langin, Grand Slam chu pawisa luh tam zawkna a nih avangin lawmman pawh tun aia sang ruahman turin thuneitute chu an phut thu an tar lang.
Gauff chuan, “Champion lawmman tihsan tawp ringawt hi kan phut a ni lo a, a hnuai berte chan thlenga tihsan hi kan duh dan a ni a. Tour lamah hian pawisa dah hnem turin kan duh a, lawmman mai ni loin player-te hamthatna pawh ngaihtuah lehzual turin kan duh a. Ranking-a 200-na te, 300-na te hi an khawsak a harsa viau thei a, sum indaih loh vangin buaina an tawk fo thei a. Kei ngei pawh hian chutiang hun chu ka tawng lo ang tih a sawi theih loh a, he infiamna ka luhchilh tirh aia tha zawka kalsan theih hi ka tum a ni,” a ti.
World No. 300 Yuriko Miyazaki chuan kum khatah $1,00,000 a la lut tling lo a, infiamna hautak em em tennis angah chuan din chhuah a harsa dawn niin a sawi a. A sum lak luh atang hian zin veivahna leh coaching staff hlawh a pek chhuah ve a ngaih dawn avangin ama chanpual chu a tam thei dawn lo niin Gauff chuan a sawi a ni.