Aizawl: Home Minister K Sapdanga chuan Mizoram Police tur lak leh tum a ni tih a sawi.
Thawhtanni khan home minister hian Mizoram Journalist Association, Serchhip District Silver Jubillee lawmnaah khualzahawm a ni a, hemi hmaa Serchhip ZPM office-ah Serchhip ZPM party hruaitute nen inkawm a, hetah hian police lak chungchang hi a sawi a. Party hruaituten khawtlang hmasawnna tur mamawh hrang hrangte thlenin a theih anga bawhzui a nih tur thu a sawi.
He hunah hian K. Sapdanga chuan, “Mizoram Police-ah hian tun dinhmunah post ruak 3,647 a awm mek a, kum tin hian thihna avang leh pension avangtein post ruak 200 chuang a awm zel ang a ni a. Police indaih lohna a nasa a, kalpaha inlak ngawt a theih a ni lo va, chhungte boral tawh ai pawh lak ngawt theih a ni tawh lo va. Dan ang taka thiltih a ngai tawh a, kum 2021 atang vel khan court leh constitution a thikthu a chhia a, sorkar hmasate kha dan khaikhupsan chungchangah an ngam hret a, sorkar liam ta pawh kha an hun hnuhnung lamah chuan an fimkhur tawh hle a ni. Police post ruak tam lutuk tihziaawmna turin home department chu a inbuatsaih leh mek a, DP&AR leh law department-ah dilna thehluh leh a ni dawn a. Police lak hnuhnung berah khan post 1,100 kan dil a, DP&AR leh law department lamin mi 250 min phalsak thung a. Police headquarters atangin survey kan nei mek a, district tina police indaih loh dan report lakkhawm a ni mek bawk,” a ti.
Home minister chuan, “Hmun hrang hranga police quarters-te pawh an awngrawp tawh hle a, hei pawh hi a chhiat dan leh tihzui dan tur November thlaah report kim theih beisei a ni a, thuam that tum a ni a. Mizo Territorial Army din tur pawh thla tharah advertisement chhuah tum a ni a, a tirah mi 75 lak tura tih niin, kan hotuten an dil belh leh a, mi 150 lak phalsak kan ni tawh a ni,” a ti bawk.