Aizawl: MZP Treasurer hlui leh West Phaileng Welfare hruaitu hlun leh OB ni lai mek Michael Lalramsanga chu MNF party-ah an president, Zoramthanga’n Thawhtanni khan a lawm lut.
MNF pary chhung inkhawm, Mizoram Hnam Runa neihah inlawm luhna hun hi hman niin mi thar lawm luh, Michael Lalramsanga chuan, “Tun hnaiah kan ram leh hnam himna tiderthawng zawnga hmalakna a awm hian rilru a tina a, Mizoram leh hnam him zelna tura theihtawpa ke pen ve turin Mizo Hnam party-ah ka rawn lut a, Mizo nationalism tuipuitu ka nihna angin a taka lo thawk tawh leh thawk mekte ruala pen ve hi ka châk a. Martarte thisena bual, Art 371G ropuizia ka hmuchiang a, a humhim turin theihtawp chhuah ka inhuam ve a ni,” a ti.
“Dampa bial mipui zawng zawngte tun by election lo awm turah MNF Candidate, mi chak leh a ngaihna hria, Dr. R. Lalthangliana vote vek turin ka sawm a ni,” tiin, “MNF sorkarin Dampa bial min ngaihsakzia hi kan hriat nawn fo a tul a ni,” a ti bawk.