Aizawl: Lengpui Airport chu Directorate General of Civil Aviation (DGCA) permit a tawp avangin leh renewal a la fel loh avangin Thawhlehni khan thlawhna tum leh thlawh chhuah theih a nih loh hnuah nimin vek khan tihfel niin service pangngaiin kalpui leh a ni.
Thudawn danin Thawhlehni khan thlawhna a tum leh thlawh chhuah theih loh avangin hun eng emaw chen chu airport-ah zin veivak an tangkhang a. Mahse, chawhnu dar 1:02 khan license renewal tihfel niin mumal takin a kal leh nghal thei a ni.
September 16, 2025 khan Lengpui Airport license renew-na hi thawn a ni a, DGCA-ah portal buai avangin an dawng thei lo va, September 26-ah thawn leh a ni a, Thawhtanni kha last date a ni a. Niminah buaina thleng mah se nimin vek khan chin fel nghal a ni.
DGCA hi India-a aviation thuneitu ber niin, thlawhnaa chuangte himna tur te, airport nih tur anga nih leh nih loh enkawltu leh thlawhna thlawh dan tur duangtu niin civil aviation ministry nena inngeng tlat an nih bakah pilot leh engineer te license petu an ni.