Chief Minister Lalduhoma’n Mizoramin khualzin hip luh theihna remchang a neihte chu hman thiam a pawimawh tih a sawi.
Thawhlehni khan chief minister hian Champhai Zotlang mualah Hnahsin Kût 2025 a hawng a. Thu sawiin Mizoramah hnam dangte an zin a, ram mawizia te, boruak nawmzia te, nature hmuhnawmzia te an hmu tih a sawi a. Mizoramin khualzin hip luh theihna remchang an ngah tih hriain hman thiam a pawimawh tih a sawi.
Chief minister chuan thangthar fingvar zawk an lo chhuak a, tourism department pawhin tourism sector a kalpui thiam tial tial a. Inkalpawhna kawng a lo tha ve zel bawk a. Khualzin hip ve tial tial tih a sawi a. Nikum chhung khan Mizoram chu hmarchhaka khualzin hip luh lama hmasawn nasa ber a ni a. Chhinchhiah chinah 5,20,000 chuangin Mizoram an tlawh a, a kum hmasa aia a punna chu 139.50% a ni tih sawiin, Sairang thleng rel a thleng ta a, khualzin hi an pung hle turah an ngah thu a sawi.
Mizoram hi an enkawl thiama khawtlang nun mawi tak hi an zawrh thiam bawk chuan sum leh pai tam tak hmuh theihna leh hnam chawi larna remchang tak an nei tih a sawi a. Khualzin kal tam ber turte hi foreigner an ni lo va, an Indian-pui, vai an tihte an ni hlawm a. Vai zin hi lo tawngpawng hlauh ngawt tur a ni lo tih sawiin, “ILP neiin an rawn lut a, an haw a hunah an haw ve leh mai dawn a ni. Heng khualzinte hian kan ramah sum leh pai an rawn hmang a, chung chu keini tan sum lakluhna hnar an lo ni ta thin a ni. Mizoram sum hi kan thenawm state-ah a luangthla hnem tawh a. Tourism hmanga lak let dan kan dap ve a ngai a ni,” a ti.
Hahsin Kût hi Champhai Nature Conservancy, YMA Zotlang Branch, Champhai District Photographers Society, Champhai North Joint VC, Champhai South Joint VC, Zotlang, New Champhai leh Tlangsam VC te tangkawpin Champhai mipui behchhana an buatsaih a ni a, Kumin hi tum hnih buatsaihna niin nikum kha mi 60,000 chuangin an chhim nia hriat a ni a. Kût denchhena Champhai leh a chhehvel mipuite sum lakluh tlingkhawm chu Rs nuai 1,000 chuang nia ngaih a ni bawk.