Bihar-a Sheikhpura district court chuan Thawhtanni khan INDIA tangrual hruaitu – Rahul Gandhi, Tejashwi Yadav leh Mukesh Sahani te chu Congress-in August thlaa Voter Adhikar Yatra an kalpui laia Prime Minister Narendra Modi an beih dan chungchanga an laka thubuai thehluhah a ko.
BJP hruaitu, Hiralal Singh-a chuan September 4 khan thubuai thehlutin hemi kal zelah hian Sheikhpura Chief Judicial Magistrate Vibha Rani chuan INDIA hruaitute hi a ko a ni.
Thubuai thehluttu aiawha ding, Gopal Kumar Barnwal chuan court hian thubuai ngaihtuah lawkna hun a buatsaih tawh a, thil thleng leh puhna a ngaihthlak hnuah hruaitu pathumte hi a ko ta niin a sawi.
CJM chuan Congress hruaitu Gandhi, RJD hruaitu Yadav leh Vikassheel Insaan Party hruaitu Sahani te hi November 26 aia tlai lovah court-ah anmahni emaw, an aiawh dan hre mi emaw inlan ngei turin a ti a ni.
BJP hruaituin dan pela prime minister beihna avanga thubuai a thehluhah hian an hming tar lan loh, tute nge an nih hriat loh mi dang 100 puh tel an ni bawk.
August thlaa Gandhi-a hova Bihar-a ‘vote ruk’ an tih mai duh lohna kawngzawh huaihawt laia thil thleng pakhat lanna video a darh a. Hetah hian Darbhanga daia tual chhung Congress hruaitu pakhatin dawhsan tereuh te an siamah mi pakhat chuan microphone-ah Modi-a chungchang a sawina a lang a. He thil huaihawttute hian hetiang a thlen lai hian party hruaitu tumah awm an awm lo niin an sawi.
Dawhsana au hi Darbhanga-a cheng tlangval kum 25 mi a ni a, a hnuah man a ni a; mahse, BJP mi tam tak an thinrim a, khawlaiah an intawng nasa a, Congress party state headquarters bulah pawh nasa takin an buai a ni.