Aizawl: Home Minister K Sapdanga’n Sairang Rel Station-a state pawn lam mi khualzin lutten Inner Line Permit (ILP) la chhuak tura rei tak intlar ngai thin chu chin fel vat a tul tih a sawi.
Thawhlehnia zinga rel station a tlawhnaah home minister chuan rel hmanga inkalpawhna kawnga hmasawnna a thlen mek rualin zin mite dawl zo tur leh harsatna an neih lohna turin Sairang Rel Station pawh buatsaih zel a pawimawh thu a sawi a. State pawn atanga rel hmanga zin mi lo lutten ILP la chhuak tura station-a rei tak intlar ngai thin chu chin fel vat a tul thu sawiin, tual chhung mi leh ILP dil chawp ngai lote tan chhuahna hran buatsaih vat turin NF Railway thuneitute chu a hrilh.
Home minister chuan Mizoram dinhmun te, Mizo hnam mipuite en hian inthlahdah a thiang lo tih a sawi a. ILP khauh lehzuala kenkawh a nih theihna atan zirlai pawl, khaw hrang hranga khawtlang hruaitute leh branch YMA tinte thawhhopuiah sawmin an theihna zawnah theuh hmala turin a ngen.
Home minister hian tun dinhmuna Sairang Rel Station-a ILP pek chhuah leh endikna kalpui dante a enfiah a. Rel station tihchangtlun zelna tura ruahmanna la awmte chu NF Railways-a thawktuten an lo hrilhfiah a. An sawi danin rel a lo thlen hian zin mi 250 atanga 300 vel chu station-a chhuk an awm thin a. Transport department ruahmannain Sairang leh Aizawl inkar tlan tur, MST bus pahnih dah a ni a, chuan man hi mi pakhat tan Rs. 80 a ni.
State pawn atanga zin mi lutten ILP dil a hun rei tak an hman loh nan online-a dilna siam a nih bakah rel chhungah ILP dilna form sem chhuah theih tura ruahmanna siam tur a ni a. Tuna hman mek, Online ILP Guidelines Version 2 chu siam that mek niin awlsam zawka dilna buaipui zung zung a nih theih nan version 3 pawh peih fel tep a ni a. Sairang Rel Station-ah hian zin mite kaihruai a, Mizoram hmun nuam leh thlawh tlakte lo kawhhmuh zung zung thei tur Tourist Facilitation Centre ruahman a tul thu sawi a ni bawk.