LeBron James chu sciatica vangin duh angin a che hleithei lo a, a taksa dinglam chu a chhawr that theih loh avangin kar thum atanga kar li vel chu a chawlh a ngai dawn a, season thar bul pawh a tan ve thei dawn lo.
James hi season bul tanna atana an game hmasa ber, October 21-a Golden State Warriors nen an inkhelh hunah a tel thei dawn lo chiang a. An rin dan chuan November thla hma lamah chuan a inkhelh loh hmel.
Kum 40 mi, James hi a tha lampang fuh loh vangin Los Angeles Lakers training-naah pawh a la inlan thei rih lo a. Damdawi thiamte chuan an en chiang a, kar li vel hi a chawlh a ngai an ti niin Lakers chuan thuchhuah siamin an tar lang.
Tun season hi James tan NBA season 23-na tur a ni tawh dawn a, Lakers-ah hian season riat a awmna a ni dawn chiah bawk.
NBA-a point score hnem ber, James hi season liam taah khan vawi 82 khelh theihah vawi 70 a inlan a, a hma leh season-ah pawh vawi 71 a lo khel tawh bawk a ni.
Season hman zawh takah khan average point 24.4, assist 8.2 a nei a, rebound 7.8 a la bawk a, Most Valuable Player-ah 6-na a ni.