Health Minister Lalrinpuii’n state hrang hranga doctor zirna in tha leh damdawi in lian awmna, All India Institute of Medical Sciences (AIIMS) tal chu Mizoramah din ve turin Union Health Minister JP Nadda a ngen.
Thawhlehni khan Union Health Minister Nadda chu Delhi-ah kawmin Health Minister Lalrinpuii chuan Mizoram chu ziak leh chhiar thiam tamna ber state leh state ralmuang ber a ni chungin state-in sorkar laipui zirna in lian – IIT te, IIM te a neih ve loh thu a sawi a. State hrang hranga doctor zirna in tha leh damdawi in lian awmna, AIIMS tal chu Mizorama din ve ngei turin a ngen.
Lalrinpuii chuan sorkar laipuiin kum 2006 atang khan India ram hmun 22-ah AIIMS thar din turin hma a la tawh a, tunah chuan hengte hi an function hlawhtling deuh vek tawh avangin AIIMS thar dinna scheme – Pradhan Mantri Swasthya Suraksha Yojana (PMSSY) chu tuaithar a, Mizoramah din ve ngei turin hmalakpui turin a ngen a ni.
Nadda chuan health minister dilna thlen chu an lo zirchian tur thu leh AIIMS hawn a nih ngei theihna atan hma a lo lak tur thu a hrilh a. Mizoram Larsap General Dr. Vijay Kumar Singh nen pawh inthian tha tak an nih thu sawiin a theih dan dana hmasawnna kawnga thawhho a duh thu a hrilh a ni.
Social welfare department minister ni bawk, Lalrinpuii chuan Thawhlehni vek khan Union Minister, Women & Child Development Department Annpurna Devi chu a pisa-ah kawm bawkin Women & Child Department hmalakna tur hrang hrangte a sawipui bakah women helpline sum pek chhuah tlai chungchang a sawi pawh lo enzui a tum thu a sawi bawk.