Aizawl: Chief Minister Lalduhoma’n North East Centre for Technology Application & Reach (NECTAR)-in Serchhip-a Zuangleng rama an din, changel kawr sawngbawlna common facility centre (CFC) chu Nilaini khan a hawng.
CFC hi Ministry of DoNER PM-DevINE sum hmanga din niin changel kawr atanga hrui siamna, kuta siam paper siamna, vermicompost siamna leh savun thlakna vegan leather an tih mai siam chhuah theihna tura duan ni.
Serchhip DC Conference Hall-a hawnna inkhawmah Serchhip bialtu MLA ni bawk, Lalduhoma chuan Zuangleng ram leh a chhehvelah hian changel a tam a, Khumtung leh a chhehvel khuaah balhla chingtu tam tak an awm bawk a. Hengte behchhan deuh hian changel kawr sawngbawlna din a nih thu a sawi a. He laia ram nei, changel leh balhla kawr paih mai mai thinten an hnawm kha sumah an chantir thei dawn tih a sawi.
Chief minister chuan Minister of DoNER puihnaah lawmthu sawiin, a buaipuitu NECTAR hmalaknaah an lawm tih a sawi a. He unit enkawltu tura thlan implementing agency APRINS chu tha taka kalpui turin an beisei dawn a, an tum ang ngeia kuthnathawktute tana tangkai taka an kalpui an duh tih a sawi.
Agriculture Minister PC Vanlalruata pawhin DoNER chungah lawmthu sawiin Mizoramin an la hmelhriat ngai vak loh changel kawr sawngbawlna Serchhip district-in an nei ta hi chu lawmawm a tih thu leh mi tam takin an tangkaipui ngei a rin thu a sawi.