Premier League club thenkhat pawh an telna, Europe-a club lian tak tak eng emaw zat chuan an player-te hah lutuk chhawk nan inkhel vawi khata player thlak theih zat chu paruk ni se tiin an sawiho mek.
Heng club lian tak takte hi kar hmasaa Rome khawpuia European Football Clubs (EFC) general assembly-ah khan substitution siam theih zat chungchang hi an sawiho a ni.
Player thlak theih zat hi he assembly-ah hian ngaihtuah tura chhawp chhuah zingah a tel lo va; mahse, club-te hian official tak ni lem lo, pawl hming pawh ni chuang lovin an inhmu khawm a. Squad-a player 25 awm thei pawh 28-a tihpun leh substitute paruk siam hi an sawiho a ni.
Italy khawpuia inhmuh khawmnaah hian Premier League atangin Manchester City, Liverpool, Manchester United, Arsenal leh Nottingham Forest pawh an tel a ni.
An sawihona hi tha ti hle pawh ni se a taka kalpui tur chuan football dan siamtu, International Football Association Board (Ifab)-in an pawmpui a ngai dawn a, eng ang takin nge an kalpui dawna a thlen chin tur chu a la hriat chauh dawn a ni.
Premier League bikah hian coronavirus leng avanga inkhel chawllh thupa tan leh hma hret, May, 2020 khan inkhel pakhata mi panga thlak theih hi kalpui tan a ni.
2020-21 season khan pathum chauh inthlan theih tura kalpui leh a ni a, 2022-23 season atang erawh kha chuan panga thlak theih chu a ngheta kalpui turin an ti leh ta a. Hei bakah hian lu lama player-in hliam a neih chuan substitute dang pakhat siam leh theih a ni bawk.
Squad-a player pathum dang dah belh hi player-te rim lutuk chhawk theihna tura an ngaih a ni bawk.
Season liam taah khan Tottenham defender Archie Gray-a chu friendly match telin ram leh club-ah matchday squad-ah vawi 80 a tel a, Europe-ah chuan Real Madrid midfielder kum 20 mi, Arda Guler-a nen a tam ber an ni.
Kum 19 mi, Gray-a hi Spirs tan vawi 48 inlanin Europa League-ah a champion-pui a, England Under-21s chu nipui lai khan Euro 2025-ah nomawi a lakpui bawk.
Hetih lai hian Professional Footballers’ Association (PFA) chuan squad-a player 28 awm hian player-te a chhawk kher dawn em tih chu a chiang lo niin an ngai a. Khel lo tam tak a awm theih dawn avangin zin chhuah ngai miah lo tam tak an zin hah a ngaih phah ve thei tho niin an ngai.
June thla khan Uefa, EFC, FifPro Europe leh European Leagues chuan player-te an inhliam dan hrang hrang, an chetna a nghawng dan leh player thatna tur thilte an lo zir chiang tawh.
Thla hmasa khan khawvel puma player inzawm khawm, FifPro-in annual report an tihchhuahah 2024-25-a an zin hah dan an tar lang a, “Inkhel lo zin leh training ngai chuan player-te tam takin a tihah,” tih an tar lang.