Tunlaiin Champhai lamah Hnahsin Kut hman mek a ni a, mipuiin an hlut hle. Hetiang kut hman hian mi tam tak tan sum a siam dawn a. Ram pawn atanga khualzin lo lut tam tak an awm ang a, tualchhung kuthmanga khualzinte sum thlauh tur nen Champhai leh a chhehvelah ringawt pawh hian sum lengvak a tam phah ngei ang.
Champhai leh a chhehvela hotel, paying guest leh mikhual thlen theihna dek dek chu a khat vek mai niin sawi a ni a, a lawmawm hle. Hnahsin kut ngaihtuah chhuakte an fakawm tak zet.
Amaherawh chu kut hman a that rual rual hian kan sawrkar hotute nen kan vaia kan phu luai luai erawh chu kan ram dinhmun ngaihtuah chian chuan a tha ber em aw a tih theih.
Chief minister leh a mi pawimawhte nen lama kut hmanga kan phili buai luai luai lai hian khawthlang lamah kawngchhia avangin mi tam tak eizawnna chuan a tuar mek a, road block an sawi uiah uaih a. Kan ei leh bar lakna kawng ber Silchar kawngah lah motor za tam tak an tang thiap thuap a, kan sum leh pai dinhmun a nghawng dan chu rapthlak tawh tak a ni. Ngaihthah vanga puh loh theih lohin kan airport neihchhun Lengpui airport lah chu licence cancel vangin an han khaihlak thul. Eng hi nge kan ngaihpawimawh tur tih hi i thlir kir fo ang u.
Kut hman pawh sum hailuhna a nih rualin heng hi sawrkar inrawlhna em em tur niin a lang lem lo. Mi ramah pawh kut an hmang nasa. Sawrkar hotupa berin an khukpui ruai lem lo. A ram mipuite dinhmun en a ngaihpawimawh hmasak tur a la nei hle zawkin a lang. Heng hi chu tourism lam thil a ni a, Tourism minister kutah dah thiam se a tha. CM ber lo zawhna huau huauah a phur bera tan reng maite hi a fuh ber lo fo ang. Kan sawrkar invuah danah chanvo an insem ang hian kal se, a mipuite kawngchhia a an tan buai laia CM ho a lo hlim hle ringawt hian ram hmasawnna min thlen a rinawm loh a ni.