Aizawl: Higher & Technical Education Minister Dr Vanlalthlana chuan zirtirtu thenkhat hnen atangin mi lian leh thil tithei zawkte puna insawn lo tura insawipui leh nawrnate a awm thin chu ti tawh lo tura a duh thu a sawi.
Mizoram Hindi Training College (MHTC) in kum 50 tlin an lawmna, MHTC Auditorium, Durtlang-a nimina an buatsaih hmanpuitu H&TE Minister Dr Vanlalthlana chuan, India ram zau zawk daidar tur leh eizawnna leh hna hrang hrangte thawk a, ram pawna chhuak thei turin tunlai khawvelah Hindi thiam a pawimawh takzet tawh tih a sawi a. Sorkarin tunlai khawvel thiamna sang zawk hmanga Hindi leh sap tawngte Mizo tawnga lehlin zung zung theihna artificial intelligence, AI-Bhashini app a buatsaih mek thu sawiin, nakum kum laihawl velah chuan a hman theih tawh a beisei thu a sawi.
Minister chuan thingtlang lamah zirna tihhmasawn a ngaih nasat thu sawiin, zirtirtu indaih lohna awm thinte tihrem a nih theih nan sorkarin hma a lak reng thu a sawi a. Aizawl khawpuia zirtirtu inbengberek nasa lutuk leh thingtlang lama zirtirtu indaih lohna nasa takte siam rem tura hmalakna kal mekah, zirtirtu thenkhat hnen atangin, mi lian leh thil tithei zawkte puna insawn lo tura insawipui leh nawrnate a awm thin thu leh hetiang thil ti lo tura a duh thu a sawi a, ram leh hnam tana tha thei ang ber turin sorkar chuan hma a lak zel tur thu sawiin, mipuite hriatthiamna leh tawiawmna a ni.
H&TE minister hian Hindi-a ziak lehkhabu 15,000 chuang awmna leh tunlai thiamnaa thuam, New Age Learning Centre & Fully Automated Library a hawng nghal a ni.