Aizawl: MNF Sr Vice President Dr R Lalthangliana’n Kawnpui leh Aizawl inkar bakah, Mamit district kawng siam tha turin sorkar a phut.
Dampa bial chhunga khaw hrang hrang tlawha campaign beihpui thlak mek, Dampa bial by-election-a MNF official candidate ni bawk Dr R Lalthangliana chuan tunah hian Mizoram chak lakluhna kawngpui ber Kawnpui leh Aizawl inkar chu nanem lovin a chhia a, bungraw phur lirthei an kal hlei thei lo va. Mualkhang/Khamrang atanga Assam lam pan tur lirthei an tangkhang nasa thin hle tih sawiin, “Kawng siamtute vil uluk lehzual turin ZPM ministry ka phut a, Mizoram enkawl bik kawngte pawh siamthat thuai a nih theih nan a enkawltu minister hian tih takzeta hma la nghal turin ka phut a ni,” a ti.
Tunah hian Mamit district mipuite pawh kawng chhiat vangin an buai tih sawiin, “Mamit atanga Aizawl inkar, Mamit atanga Bairabi leh Mamit atanga Zawlnuam inkar kawng pawh lirthei eng chi mah a kal hlei thei lo a. Tun thlengin ZPM sorkar hian hmalakna mumal a nei lo a, heng lai kawng chhiate hi ZPM sorkar hian mutmawh hnar mawhah nei turin ka phut takzet bawk a ni,” Dr. Thangtea chuan a ti bawk.
Dr. Thangtea chuan by-election ah thlan tlin a nih chuan, Mamit district chhung inkalpawhna kawng hrang hrangte siamtha tura theihtawp a chhuah tur thu te, Dampa bial chhung inkalpawhna kawng hrang hrang bakah kut hnathawktute tan Agriculture Link Road tam zawk siam tura hmalak a tum thu a sawi bawk.