Aizawl: Mizoram Indane Distributors’ Association (MIDA) chuan kumin krismas leh kum tharah pawh eirawngbawlna gas hnianghnar hmuh an beisei loh thu an sawi.
Thuchhuah an siamah MIDA chuan kumin June thla atanga vawiin thlengin ram pumah eirawngbawlna gas a thleng tha lo tih an sawi a. Heng hi NH 306 huam chhung Sairang leh Kawnpui inkar kawng chhiat vang a nih thu leh kawngpui hian that lam aiin chhiat lam a la pan chho zel a, tun dinhmunah LPG truck-te hi ni li/nga an la thang thin a, kawngpui chhiat avang hian truck an thang rei chuan LPG Bottling Plant lamah truck indaih lohna a thleng thin tih sawiin, LPG Bottling Plant-in load pek duh mah se truck awm loh chang a awm thin thu an sawi.
MIDA chuan tunah hian mipuiah gas indaih lohna, harsatna a thleng mek tih sawiin, “Heng harsatnate hi thuneitute hnenah thlen a ni tawh chungin ngaihsak a hlawh lovin hmasawnna a awm lo hle. Hetiang reng a kan kal zel chuan kan hunpuiah lo thleng tur, Krismas leh kumtharah pawh gas hnianghara hmuh a beisei awm ta lo. Chuvangin, mipuite hriatthiamna kan ngen rualin kan sorkar hian kan kawngpui hi siam tha vat turin kan ngen a ni,” an ti.