Rajasthan-a Jaisalmer atanga Jodhpur pana bus tlan lai chu Thawhlehni chawhnu khan a kang a, a chuang mi 20 an thi niin police-in an sawi.
Police chuan bus-ah hian mi 57 an chuang a, chawhnu dar 03:00 velah Jaisalmer a chhuahsan niin an sawi a. Jaisalmer-Jodhpur highway-a a tlan lai hian a hnung lam atangin meikhu a chhuak tan niin an sawi.
Kawng sirah a khalhtu chuan dinpuiin hun rei lote hnuah a pumin a kang nghal hluah a ni.
Tual chhung mi leh a bul hnaia kalte tlan khawm nghalin chhanchhuah hna an thawk nghal a, kang thelh khawl leh police an hriattir nghal bawk.
Police chuan electric kal sual atanga kangmei hi chhuak a nih a rinawm niin an sawi a. Bus hi ni nga kal taa lei fel chauh kha niin a la thar hle a ni.
Prime Minister Narendra Modi-a chuan X-ah thil thleng pawi a tih thu a tar lang a, “Jaisalmer, Rajasthan-a vanduaina thlengah mi tam tak thihna a thleng hi pawi ka ti hle a. A tuartu leh an chhungte ka tawhpuiin ka hre reng a, hliam tuarte pawh an dam leh thuai theih nan ka tawngtaipui a ni,” a ti.
Prime minister hian Prime Minister’s National Relief Fund (PMNRF) atangin thite chu Rs nuai 2 theuhva ral an nih tur thu leh hliam tuarte pawh Rs 50,000-a kan an nih tur thu a puang nghal bawk.
Rajasthan Chief Minister Bhajan Lal Sharma-a pawhin Thawhlehni zan khan Jaisalmer a thleng nghal a. A pisaa thuneitute chuan chhiatna thlenna hmun pawh a tlawh tih an sawi.
Sharma hi Pokaran MLA Pratap Puri, MLA Sangh Singh Bhati leh district thuneitu dangten an tawiawm a. He thil thleng a ngaih pawimawhzia lantir nan chief minister hian Patna-a campaign programme a hman tur pawh a thulh nghal.
Hliam tuar zinga hmeichhe pali leh naupang pahnih telin, mi 16 chu an hliam na zual a, thenkhat chu an taksa 70% lai kang pawh an awm a. Ambulance pathum hmangin Jaisalmer-a Jawahar Hospital panpui an ni a, a hnuah enkawlna tha zawk dawng turin Jodhpur-a kaltir leh an ni.
Jaisalmer district thuneitute chuan bus a kang tih thu an hriat veleh chhanchhuah leh chhawmdawl hna an thawk nghal tih an sawi a. District Collector Pratap Singh-a chuan thuneitute chu hliam tuarte a tha thei ang bera enkawl nghal turin a ti a, helpline number pawh siam nghal a ni.
National Highway 125-ah hliam tuarte rang taka phurh chhuah an nih theih nan green corridor siam nghal a ni a, ambulance pariat hmanga inthiarin police-in an veng bawk.
District collector chuan bus hi a kang chhe vek tih sawiin thite pawh tute nge an nih hriat theih loh khawp an ni hlawm tih a sawi a. Jodhpur atangin DNA leh forensic team koh niin tute nge ni hriat tuma hmalak a ni.
“Ahmedabad-a thlawhna chesuala tih ang khan DNA testing hmangin thite hi tute nge an nih hriat tuma a ni a. Finfiah an nih hnuah an chhungte hnenah hlan an ni ang,” tiin Collector Singh-a chuan a sawi.