US chuan ruihhlo tawlhtute ni ngeia an hriatte chu Venezuela vaukama an lawng a kap leh a, mi paruk an thi niin President Donald Trump-a’n a sawi a, hei hi tun hnaia heng lai vela a sipaiten ruihhlo tawlhtute laka beihpui a thlakna thar ber a ni.
Trump-a’n hetianga a ti hi Los Angeles-a a sipaite an chakna hmanga dan ang leh kal phung thara an rama ruihhlo tawlh luttute nia hriat laka beihpui thlak tur leh na zawka kal tura a tihna thar a ni.
Truth Social-ah Trump-a chuan Thawhlehni (India-a zan rei lam) khan firfiak pawl tia a sawite an beih thu hi a tar lang a, a sawi thui lo thung.
“Chhuituten lawng hi ruihhlo tawlhtu, dan lova ruihhlo tawlhtu inzawmte zinga mi an ni tih an finfiah an ni,” tiin Trump-a hian a tar lang a, a bak a sawi lo.
Second 30 vela thui video a dah tel a, hetah hian tuipuia awm lawng pakhat chu eng emawin a fuh a, a puak zui a ni.
Pentagon chuan tun hnai khan Congress hnenah Trump-a hian US chu ‘tute ram mah tibuai lovin’ ruihhlo tawlhtu pawlte lakah hma a la tih an lo thlen tawh.
Hetih lai hian sipai dan hre mite chuan Trump-a sorkarin ruihhlo tawlhtu nia a rinhlelhte man lova a that chu indo danin a phut ang chu a ni lo niin an sawi.
US sipai lawng lian chu Caribbean chhim lamah a awm a. Puerto Rico-ah F-35 indo thlawhna a awm bawk a, heng lai velah hian US indo lawng pariat a awm a, thawktu leh sipai tam tak an awm tel a, nuclear chakna hmang tuihnuailawng a awm bawk.
Trump-a hian a hma lama hetianga ruihhlo phur nia an sawi lawng an beihte nihna hi a puang tawh a, an mi thahte nihna leh an thil phurh nia an sawi pawh a puang bawk.
Venezuelan President Nicolas Maduro-a chuan hetianga an ram tuipuia US chetna demin a thuneihna paih thlak tumah a puh a. Washington chuan August khan Maduro-a man theihna tura pui thei hnenah $ maktaduai 50 pek tiamin ruihhlo tawlh leh mi sual pawl nena inzawmna neiah an puh ve thung a, amah chuan a pha.