Aizawl: Ruahmanna thar ber ang chuan Assam Rifles chhuahsan ram zawng zawng zaa 39.33 chu mipui mamawh hmunhma sakna tur niin, a dang zawng zaa 60.67 chu green area tura tih a ni.
Ningani khan Chief Minister Lalduhoma hovin CM Conference Hall-ah AR chhuahsan ram hman dan tur ngaihtuahtu, Advisory Committee on AR Land chuan rawtna hrang hrangte sawi hovin master plan siam thatte an thlir let.
Thutkhawmah hian Aizawl Square, Ring road ni nghal siam te, a ram chhuah lama bypass road, hmar lamah Saron atanga kal, Dak Inpui bula chhuak sial te, mi 2,000 lenna convention centre, a hnuai lam lirthei park-na lian tham tak nei sak te, kawngpui kam hmun hniha mini park siam te, two wheeler parking siam te, heritage court siam te, bypass road kiang Venghlui lam hnaiha multi level car parking leh open air theatre sak te a pawm a. Khawpui laili chawmtu turin Baja tlanga tui dahkhawlna sak leh chhuah lam bypass road kianga 33 KV Sub Station dah an remti.
Tuna kawngpui awm sa hi a theih ang anga tihzauh ni se an ti a, lungphun awmsate vawnhim tha an ti a, Canteen kuala War Memorial chu MINECO-a sawn an rel a. |hutkhawm hmasaa Aizawl Civil Hospital tihzauh nana Aizawl Police Station awmna hman a nih theih nan police station hi AR Hospital tlangah sawn ni se, tia an lo sawi tawh chu a hmunhma tura an tinzawnah a len theih dawn loh avangin Aizawl Police Station hi sawn phei chi-ah an ngai leh lo va, out post dah chi zawk nia ngaih a ni.
Khatlaa Assam Rifles ram mawng lam, Mizoram Secretariat tihzauh theihna lai tur leh Loch House, tuna Mizoram sorkar kuta awm tate chu inthlengpui dil ni se, a hlawhtlin chuan Chief Minister’s Office leh Residence sawn phei nana hman ni se, an ti bawk.
McDonald Hill, Zarkawta CM Office-ah meeting a tam thin a, Secretariat atanga kalin traffic jam vangin a hautak thin a. He harsatna pumpelh nana chief minister hmunhma MINECO lama suan thaa ngaih a ni.
Babu tlanga AR ram chhuahsan, Zarkawt khawtlangin enkawl an dil chu a neitu nihna nei lova green park atana an enkawl theih dan tur inkaihhruaina GAD-in lo duang nise an ti bawk.
Thutkhawm tum thumnaah hian UD&PA Minister K. Sapdanga pawh a tel a ni.