Aizawl: Mizoram Flagship Programme Bana Kaih (Handholding) Scheme phase-I hnuaia loan pek zingah bank-ten loan diltu a hnawl zat 128 an awm.
Nimin khan Bana Kaih (Handholding) Scheme hnuaia Loan component chungchanga hmalakna thlirhona, Quarterly Meeting chu Mizoram State Policy Coordination Committee (MSPCC) Vice Chairman Dr. KC Lalmalsawmzauva hovin Planning & Programme Implementation Department Conference Room-ah neih a ni.
He thutkhawmah hian Phase–I hnuaia loan pek tura committee-in a thlan, bank-in a lo hnawl takte chungchang sawiho a ni a. Bank-ten an hnawl chhan hrang hrang zingah loan diltuin loan dang rulh mek lai a lo neih avang te, loan chhia an lo neih tawh avang te, hmalakna behchhanna tur in hmun/lo/ram chungchangah thil fel lo awm avangte leh chhan dang hrang hrang avangte niin, diltuin anmahni thutlukna ngeia inhnuklet leh pawh an awm a. Bank-in a hnawl zat hi a vaiin 128 a ni.
He hunah hian partner bank pathum aiawhte leh Implementing Department Nodal Officer-te an tel a ni.