Joint Civil Society of Mizoram (JCM) chuan Forest Conservation Amendment Act, 2023 (FCAA 2023) chungchangah an dinna a la ngai reng tih an sawi a. FCAA 2023 chu ennawna sut leh ngei tur leh Article 371G chawinunna atan zanin hian ‘Candle Light Vigil’ nei turin mipui an ngen.
JCM hruaitute hian FCAA 2023 hi a nih ang anga lo pawm hi Mizoram mipuite tan a him lo va, sut leh ngei tura legislator-te an ngenna kha an dinna a la ni reng tih an sawi a. Ram rorelna in sangah sut leh a nih theihna atan hma lak zel kan tum tih thu sawiin mipuite tawiawmna an ngen tih Ningania Aizawl Press Club-a thu thar thehdarhtute an kawmnaah an sawi.
NGO leh political party hmaichhana an kawmte leh remchang danga pawl ngaihdan leh thlirna nemnghehsaktute chungah lawmthu an sawi a. JCM kut a chak tawk loh theih avangin political party-te leh NGO dang pawh pawl mal anga hma lo lak zuina kawngah an mitmei ven a ngaih loh thu an sawi bawk.
JCM hruaitute chuan FCAA 2023 chu an zavaia tana dan tihbaiawm tak a nih avanga an duh lohna leh ram roreltute chu an thu lo rel tawh enawnna, sut leh ngei tura an ngen hona leh, Article 371G chawinunna ‘Candle Light Vigil’ chu zanin hian an buatsaih dawn tih an sawi a. Hei hi a huho emaw, chhungkaw ang pawhin emaw, district hqrs mai bakah khua leh veng tinah a theih leh remchan dan anga hun hmang turin an ngen bawk.
Kawngpui dinhmun an fankualna leh report an dawnte atangin kawngpuite chu sorkar inthlahdah leh ngaihthah avang te, over-loaded truck avang te, legal metrology leh transport deptt. enforcement chak loh te chu a chhiat chhan bulpui nia an hmuh thu an sawiin, “Hengte kan ngaihtuah hian kan sorkar hian a inrelbawina lam thlenga inennawn ngam kan duh a, an dinhmun kalsan phal leh ngam an awm pawhin a mawh lo turah kan ngai a ni,” JCM hruaitute’n an ti bawk.