Ni nga a liam hnuah pawh Mexico tui lian avanga chin hriat loh mi 75 an la awm mek a, sorkarin an harsatna a hmachhawnpui danah mipui an lungawi lo hle.
Tui lian avang hian mi 66 vel an thi a, chhungkaw 1,00,000 velin an tuar bawk.
An ram laili leh khawchhak lama ruah nasa tak a sur hnuah lei a min a, lui lianin lei a chim a, kawtthlerte tuiin a chim vek bawk.
Chhiatna thleng hian President Claudia Sheinbaum-i sorkarin beihna a tawh nasat phah hle a. A thlak tak, Andres Manuel Lopez Obrador-a chuan ei rukna avangin thiltih a muang niin a sawi a, president chuan a nih loh thu a sawi.
Sorkar laipuiin rikruma hman turin peso tluklehdingawn 19 ($ tluklehdingawn 1.03) a neih thu leh peso tluklehdingawn 3 an hman tawh thu an sawi a. “Chhiatrupna thlenga hman turin pawisa a awm tam tawk,” a ti.
Nilaini khan San Luis Potosi state-ah chuan Sheinbaum-i hian sorkarin thawh hniha puihna a pek a ni dawn tih a sawi a, a hmasa hi hnawm thenna a ni a a dawtah in chhiate thawm thatna turin ‘chhawmdawlna’ pek an ni dawn tih a sawi a. Hemi dawtah hian kawngpui leh tui paihna siam thatnaah a pui dawn bawk tih a sawi.