AZL: Sorkarin sawhthing a leinaa Rs vbc 4/5 vel chingpen ni-a sawi chungchangah Social activist, Vanramchhuangi (Ruatfela Nu)-in nimin khan Anti Corruption Bureau (ACB)-ah FIR a theh lut.
FIR a thehluhah hian Vanramchhuangi chuan tun thla ni 10 leh ni 11-a tual chhung chanchinbu leh social media site hrang hranga a hmuh angin sawhthing leina sum Rs vbc 4/5 vel a chingpen niin agriculture minister-in a sawi a. Minister sawi atang hian sawhthing leina sum hi a chingpen ngei tih a chiang tih a sawi.
Sawhthing leiah buaina dang pawh a awm a, Burma atanga sawhthing la lut a, tual chhung thar anga hralh tum pawh an awm tih minister-in a sawi a. Hei hi thil serious tawpkhawk a nih avangin mipui sum tam tak tichingpentu chu tu pawh ni se, dan anga chhuia an phu tawk hremna an hmuh ngei theih nan hmalaksak turin a ngen a ni.