Ni 15.10.2025, nilaini khan education minister chuan zirtirtute chu transfer and posting chungchangah mi thenkhatin an post sawn lo turin milian leh thiltithei te ruaiin an insawipui tir thin niin Hindi Training College-a an kum 50-na lawmnaah a sawi a. Minister thusawi hian kan Mizoram sawrkar hnathawkte awmdanah ngaihtuah a ti thui khawp mai.
Kan sawrkar hnathawkte hian khawpuiah hian awm hram hi an tum vek emaw tih mai tur hian an inchuh luih luih mai a. A thei theiin Aizawla insawn luh dan hi an zawng ber ni mai hian a lang hial tawh. Hei hi tun maia thil thleng ni lovin hun rei tak atanga thil awmdan a ni a, Aizawla awm theite chuan an awm duhna chhan ber chu engkim maiah facilities a that zawk vang a ni. A bik takin an chhuanlam ber chu fate tana zirna tha an duh vang a ni zual.
Aizawla awm vek duhna hian kawng engkimah Mizoram hmasawnna a nghawng a, kan Aizawl khawpui chu mitin pem luhna, khawpui tawt leh hrehawm takah kan chhuah ta. Thingtlang lamah zirna a chhiat phah a, khaw tam takah chuan zirtirtu an awm mumal loh avanga naupang sikul kal tha thei lo an tam a, an zirna a chhe em em a, khawpui zirlaite nen an inthiam hleihin an tan hmalam hunah khaw eng aiin khawpui mite tluk lohnaah an tlu lut nghal a. Ram pum hmasawnna in nasa takin a tuar a ni. Damdawi in enkawlna lamah pawh thingtlang lama thawktute awm mumal loh avangin harsatna tam tak a awm a, chuvangin thingtlanga awm loh dan hi sawrkar hnathawkte hian an zawng ngar ngar a ni ber mai. A thei theiin sawrkar a thiltitheite ruaiin Aizawl awm hram tumna a lo thleng chho zel bawk.
Hetiang dinhmuna kan zoram a lo awm tak avang hian kan sawrkar hian inthlan hmaa an campaign hlaah pawh thingtlang lam zirna leh hriselna in enkawlnaah thuamthat an sawi ring hle anih kha. Vawiinah hian kalphung tha lo chu thlak a, insawipui luai luai avanga zirtirtu posting thlak kual chu minister in tihtawp a han tum a. A harsa hle ang tih chu a hriat reng mai. He tumna hian mipuite hi a thu chauh ni lovin, a taka kan zawm a, keimahni chungah a lo thleng a nih pawhin a tuartu a kan tan ngam a ngai tih hi pawm tum ila. Thu kan zawm chuan ram tana inpe kan ni tihnaah pawmin thu zawm thei turin inpuahchah hram hram ang u.
Minister pawh hian a thusawi hi a ti hlawhtling theitu chu amah a ni tih hria se, sawipuitute chu mipuia puan ai chuan a taka lo danga tihlawhtling theitu a ni tih inhre reng bawk se. Sawipuitute avanga a duh anga hna a kalpui thei lo a nih chuan minister tlak a ni bawk hek lovang. Khauh taka a thusawia a din ngam a ngai. A thusawia a din ngam loh emaw, a hnaa a aia lal emaw an awm a nih chuan hna a thawk thei dawn lova, politics a innawrna hi tibo ngam se. Thingtlang lam zirna tha siam tur hian theih tawp i chhuah tlang ang u.