Aizawl: Aizawl District Magistrate Er Lalhriatpuia chuan vawk vulhten natna hlauhawm tak African Swine Fever (ASF) an kai loh nan leh a darh zel loh nan te, mipuite him nan leh fimkhur zel nan vawk chungchangah inkhuahkhirhna thupek a chhuah.
Aizawl district-ah ram dang leh state dang atangin vawk, vawksa leh vawksa atanga siam ei tur chi lak luh khap a nih thu leh district dang, ASF lenna atangin vawk atanga siam ei tur lak luh khap a nih thu te, vawk damlo reng reng talh leh hralh khap tlat a nih thu te, vawk thi thuk takah disinfectant nena phum tur a nih thu leh vawk in leh a vel disinfect vek turin a hriattir.
Aizawl district chhung, khua leh khua emaw, veng leh veng emaw-a vawk inlakpawh tawn tur reng rengin vawk hri sei tha chauh lak tur a ni. Vawk damlo (ASF hri kai) ni-a rinhlelh awmna khua/veng atangin vawk lakluh leh lakchhuah khap tlat a nih thu a tar lang bawk.
He thupek hi tihdanglam a nih loh chuan chhuah a nih atangin thla hnih chhung a huam anga. Dan bawhchhia te chu Section 223 of BNS 2023 hmangin hrem an ni ang.