Prime Minister Narendra Modi-a chu Pathianni atanga tan tur, Malaysia-a ASEAN Summit-ah a inlan loh hmel a, a tih tur tul neih sa tam tak avangin intawh khawm hi a chhim hman dawn lo nia sawi a ni.
External Affairs Minister S Jaishankar-a chuan India ai a awh dawn nia sawi a ni bawk a. Sorkar atang chuan tu berin nge ram aiawh dawn tih erawh sawi a la awm lo thung.
ASEAN (Association of Southeast Asian Nations) Summit hi Kuala Lumpur-ah Pathianni atanga Thawhlehni thleng nghah a ni.
India aiawha Malaysia-a kal tura Jaishankar-a sawi rik a nih mek lai hian Modi-a hian ASEAN-India Summit chu ral atangin a chhim dawn tho nia sawi a awm bawk.
Prime minister hian Indian aiawhte chu ASEAN-India Summit leh East Asia Summit-ah a lo telpui tawh thin.
Malaysia hian summit chhim tur hian US President Donald Trump-a leh ram dang hruaitute pawh sawmin ASEAN ram dangten an hmuh theihna remchang an siam dawn a. Trump-a pawh hian Pathianni atangin Kuala Lumpur hi ni hnih chamin a tlawh dawn a ni.
ASEAN-India indawrna hi huang bik neiin kum 1992 atang khan kalpui tan a ni a. December, 1995-ah huang zauhvin kum 2022 atang khan summit pangngai angin kalpui tan a ni.
ASEAN-ah hian Indonesia, Malaysia, Philippines, Singapore, Thailand, Brunei, Vietnam, Laos, Myanmar leh Cambodia a tel.
India leh ASEAN ramte hian tun hnai kum eng emaw ti kal ta atangin inthlunzawmna nghet tak an siam a, sumdawnna leh investment piah lamah ram venhimna kawngah pawh nasa takin an tangho.
Ruahmanna hmasaah chuan Modi-a hian Malaysia a tlawh rualin Cambodia tlawh tel nghal tura tih a ni a. Kuala Lumpur a kal dawn tak loh avang hian Cambodia a tlawh hun tur pawh sawn a ni dawn ta nia sawi a ni.