Aizawl: Chief Minister Lalduhoma’n YMA member-te chu eirukna dopuiah a sawm.
Nilaini zana Sakawrdaia Chengkawlawn Run-a YMA Inkhawmpui Lian vawi 75-na a hmanpuinaah chief ninister chuan YMA chu a awmna hmun apianga mipuite thlamuantu a nih avangin mi tin tana pawl tangkai a ni a. Ramri a buaiin YMA an lo lang a, khuarel chhiatna a thlenin YMA hmel an hmu a. Zofate insuihkhawmna kawngah ni se an tangkai reng thin tih a sawi.
Chief minister chuan YMA member-te chu eirukna dopuiah sawmin, mahni chhungkuaa bul tanin eirukna suma lei thilte duh lo ngam turin a ngen a. Security Coordination Committee thutkhawm hnuhnung ber report-a a lan danin Mizoramah rukruk case a sang fal hle a. Thingfak leh suka kawngkhar do mai mai thin hnam an nih thin kha hriain, eiruk leh rukrukna lam chi chu do tlat turin a sawm.
Lalduhoma chuan YMA leh sorkar thawhhona Ruihhlo do Task Force an tinung thar a, Hulhhliap Short Stay Centre leh Operation Jericho an kalpui ho mek tih a sawi a. Zofate huikhawmna kawngah sorkar pawhin hma a la nasa a, Mizo Diaspora Cell an din a, Mizo DiasporaHub portal an siam bawk a. Tun hnai lawkah pawh Singapore-a hnathawka awmte harsatna chu an bawhzuisak thu a sawi.
Chief minister chuan ILP kenkawh dan tur tha zawk sorkarin a duang mek tih sawiin, ILP nei lote hi chu branch tinten an venga awm phal lo se dan an zawm that lehzual a rin thu a sawi a. YMA member-ten Central YMA hruaitu an thlan tlin apiang chu sorkar pawhin lungsi taka an thawhpui dawn thu a sawi bawk.
Nilaini zan vantlang inkhawm hi Central YMA President Lalhmachhuana’n a kaihruai a ni.