Aizawl: Dampa bial by-election neih tura MNF official candidate Dr R Lalthangliana’n thlan tlin a nih chuan political party thliar lovin, khaw tinah VC/NGO leh party zawng zawngte nen ruahmanna an siamte tihhlawhtlin chu a hna hmasa berah a neih tur thu a sawi.
Ningani khan Dr R Lalthangliana’n Lungphun, Hreichuk, W.Lungdar, Khawrihnim, Chungtlang, Rulpuihlim leh Tuahzawlte fangin party hruaitute nen an inkawm a. An inkawmnaah MNF Sr Vice President chuan thlan tlin anih chuan aspirational district dinhmun atanga khaichhuak turin theihtawpa hmalak a tum thu a sawi.
Dr R Lalthangliana chuan ni 100 inhlawhna mumal zawka kalpui anih theih nante, hriselna lamah Dampa bialin hma an sawn theih nan leh bial mipuiin awlsam zawka health clinic an neih theihna tur bakah PHC leh Sub-Centre thawktute indaihlohna phuhruk tura hma lak a tum thu a sawi bawk.
Education Sector-ah thapui a thawh tur thu sawiin, “Education chawikan nan bial chhung sikul building tihchangtlunna kawngah leh dinhmun tha zawka hlankai ngaite tan hmalak a ni ang a. Zirna lamah hmasawn nan bial chhungah college din theihna awm khuaah din tura hmalak a ni ang,” a ti bawk.
MNF candidate chuan thlan tlin anih chuan political party thliar lovin, khaw tinin an mamawh ei bar zawnna leh development hrang hrang ngaih pawimawh bikte chu VC/NGO leh party zawng zawngte nen inrawnkhawmin, ruahmanna an siamte chu tihlawhtling turin a hna hmasa berah a neih tur thu a sawi bawk.