Aizawl: Chief Minister Lalduhoma’n kum nga chhung hian tam tak hmun hman loh tur an neih avangin an hlawhtlinna hmel hmu tur chuan kum 10 aia rei rorelna fawng an chelh a ngaih thu a sawi.
Aizawl East II ZPM Block-in Dawrpui Multipurpose Hall-a Block Conference an neih Ningania a hmanpuinaah Chief Minister Lalduhoma chuan an party mi leh sa contract hnathawkte pawh an thawk chhe tur a ni lo va, mi pahnih khat lek hna thawk tha tawk lo an awmin a darh chak thin avangin hna tha taka thawk thin tura chahin, “ZPM kan sorkar hnua hnathawhte chu a tha tlangpui tawh a, State Project Monitoring Committee te an thawkrim bawk a, hma an sawn chho hle a ni,” a ti.
Lalduhoma chuan tun thlengin an minister leh MLA te zingah eiruknaa hming hluai an la awm lo chu a lawmna a nih thu a sawi a. Ram hruaituten hriselna tha leh finnate, rinawmnate an neih zel theihna turin party mite pawhin tawngtaipui thin tura chahin, “Kan hmalakna leh kan hmachhawp hrang hrangte tun maiah kan hmu hman dawn lo, kum nga chhung hian tam tak hmuh hman loh tur kan nei a ni. Chuvang chuan a hlawhtlinna hmel hmu tur chuan kum 10 aia rei rorelna fawng kan chelh a ngai a, chutiang tur chuan party mite i tang sauh sauh ang u,” a ti.
Khualzahawm B Lalchhanzova, Aizawl East II bialtu MLA pawhin thu sawiin, tun hnaiah eptu party ten sum lengvak a tlem tia thu an tithang chiam chu, kalphung remdik chhoh zel a nih avang hian pawisain a hlutna tak tak a rawn lanchhuah tir ta tih a sawi a. Tun hmaa ram leh in hmun lem hralh vak vak thin kha a rem chho ta a, smuggler-te an tawmim chho a, buhfai kawng bote pawh a tlem chho sawt tawh hle a, dan lova thiltih avang sum lakluhna kua a pin tak zel avang hian ho mai maia sum thehthang a tlem ta a, hei hian sum lengvak tlem angin a tilang tih a sawi bawk.