Central YMA khawmpui lian a tiak ta. Hruaitu thar tha tak takte an awm thu kan hre thei a, heng mite hian kumpuan hmalakna kawngah engtinnge hma an lak ang tih chu ngaihtuah ngai a ni ta a ni.
Ruihhlo Do kumpuana nei chungin hruaitu tharten hma an la tan dawn a ni a, member te chuan an hmalak tum dan leh an hmalak chhoh dan kan lo thlir reng dawn a, engtin tak hma la chho ang i maw?
Pawl reng reng chu hruaitu ni mekte kaihhruai danin thui tak kawngro a su a, mipuiten beiseina sang tak kan neih chhoh bawk avangin thawm tih nat thiam pawh a tul ber chang a awm fo.
Kan ramah ruihhloin nasa takin bu a khuar a, sorkar leh kohhran mai bakah khawtlangin theihtawpin do mah ila, vawiin thlengin do hneh theih a la ni lo. Tunah kan rama tlawmngai pawl lian berin kumpuan atan ruihhlo do an nei leh dawn a ni a, beiseina a sang hle.
Hruaitu thar tha tak tak kan nei leh dawn ta a, heng mite min kaihhruai dan hi member te chuan kan thlir ber a ni dawn a, ruihhloin kan thalaite nasa taka min suat tawh leh min luhchhuah tawh avangin hruaitu tharte pawh hian hlauh nei lova hma an lak pawh a tul awm e.
Kan ram thalaite ruihhlo bawiha an tan loh nan leh a hlauhawmzia hre chunga hma an lak a, ruihhlo hmansual pawizia hrereng chungin YMA member tinin hruaitu tharte kaihhruaina hnuaiah ruihhlo i doin, hneh ngei i tum bawk ang u.