Aizawl: MPCC President Lal Thanzara’n Dampa bial by-election-ah an party candidate John Rotluangliana an thlang tling a nih chuan kum 2028-ah NLUP an thlang tling leh tihna a ni tih a sawi.
Congress party chuan Dampa bial by-election lo awm tur atan Ningani khan New W Phaileng, Dinthar Bazar-ah Campaign khuhhawnna an nei a. He huna thusawitu MPCC President Lal Thanzara chuan, Dampa bial by-election-ah an party candidate John Rotluanglian chu thlang tling ngei turin Dampa bial mipuite a ngen a. “Ani hi minority-te hmangaihtu a ni a, Dampa bial tan pawh hian hma nasa taka la thei tur a ni. In thlan tlin hian 2028-ah NLUP in thlang tling leh tihna a ni. Congress kan sorkar leh chuan NLUP changtlung zawk kan siam dawn a ni tih ka puang duh a ni. Congress chuan kan ti ang kan tih chu kan ti thin, dawt kan sawi ve dawn lo,” a ti.
Dampa bial INC candidate John Rotluangliana pawhin thu sawiin, tun tum by-elction-ah hian sorkar lai ZPM hi an hlauthawng hle a, a chhan a hmuhchhuah chu he sorkarah hian mipui an beidawng tih a sawi.
John Rotluangliana chuan ZPM sorkarah hian bazar-ah te hian pawisa leng vel hi a awm lo, mahse dawt leng vel a tam thung tih sawiin, “Kan ti ang an tih chu an ti lo fai vek a ni,” a ti a. Dampa bial mipui MLA ni turin a lokal tih sawiin, an duhsaknaa thlantlin a nih chuan party thliar lovin tu pawh lokal se, theihtawp a chhuahsak zel dawn tih a sawi bawk.