Kumin kum tirah khan Harry Kane-a chuan a professional career-a a season 15-naah Bayern Munich chu Bundesliga-ah champion-puiin a vawi khat nan nomawi a la.
A hmabakah club, ram leh a mi mal tan nomawi leh chawimawina lian dang a hnai mek em tih chu zawkna a awm mek.
Tun hnaiah a khel tha em em a, England striker hi September thlaa 2025 Ballon d’Or award semnaah khan 13-na chauh a ni a, 10-na aia sang a la ni ngai lo.
Paris St-Germain forward Ousmane Dembele chu Paris-a chawimawina semah hian khawvela tha berah thlan a ni.
Kum 32 mi hian tun season-ah club tan vawi 12 a inlanah goal 20 a thun tawh a, Nilaini zan khan Bayern Munich chu Club Brugge lakah 4-0-in Champions League-ah a chakpui leh bawk.
Kane-a hian goal a thun thei chhunzawm zel a nih chuan Europe-a club inelna lian berah hian a champion lo vang tih a sawi theih loh va, England chu nakum World Cup-ah champion tura rinkai an ni bawk a, a tan 2026 Ballon d’Or hi a hnai viau anga ngaih theih a ni.
“He chawimawina dawn hi chu ka chak a, team leh mi mal anga chet thatna ropui tak a ni tih lanna a ni,” tiin tun thla tir khan Tottenham Hotspur striker hlui hian a sawi a. “Season tha tluantlinga hman a ngai dawn a ni,” a ti.
English player zinga he chawimawina dawng hnuhnung ber chu kum 2001-a striker Michael Owen-a’n a dawn kha niin Liverpool-a a khelh lai kha a ni a. Stanley Matthews (1956), Bobby Charlton (1966) leh Kevin Keegan (1978, 1979) te chauhvin an la dawng bawk.
Kane-a hi a pangana a ni dawn em tih a la hriat loh va, tun ang renga goal a thun thei zel a nih chuan a dawng lo vang tih hi sawi harsa tak a ni.
September thla khan Kane-a hi tun kum zabia Europe league lian pangaa club tana goal 100 thun tling rang ber niin khelh 104-a a thun a, tunah hian vawi 108 khelhah goal 105 a thun tawh bawk.
2023-24 season atanga chhiar tanin Europe-a league lian pangaah ani aia goal thun tam an awm lo.
Lionel Messi leh Cristiano Ronaldo meuh pawh khan Kane-a hi season khata goal 20 thun tlin ranah an pha lo va, England tana goal thun tam ber ni mek hi chuan tun season-ah hian minute 54 dan zelah goal a thun ziah ang a ni.
Bundesliga-ah goal 12 a thun tawh a, vawi sarih chiah an la inkhel a, hetiang zela a kal chuan goal 58 zet thun tling thei tur a ni.
Kane-a hian Robert Lewandowski-a’n Bundesliga-a season khata goal thun ber record a lo siam tawh, goal 41 thun tlin a um mek a, vawi 27 khelh a la nei a, goal 30-in a la phak lo.
Europe-ah pawh Champions League-a Bayern tana a inlan hmasak ber, September, 2023 atang khan goal 24 thun tawhin mi dang thun tur vawi ruk a siamsak tawh bawk a, ani aia a inlan hmasak ber atanga goal thun tam leh goal-a inrawlh tam an awm lo.