National Highway 306/06 siam that phut vanga Mizoram Tipper Association (Driver’s & Owner’s), District Hqrs Joint Action Committee, Kolasib ten kawngpui dan an ruahman chu nimin khan an kaltlangpui a, Kolasib khaw chhung, Rengtekawna duty-te chu Kolasib police-ten manin chanchin buatsaih lai thleng hian lock up-ah hren an ni.
Kawngpui hi zing dar 7 atanga dan tan niin Mizoram chhuahsan tur lirtheite tlan tlang mah se, bungraw phur lirthei lut a awm lo va, Cachar truck hruaitute hnenah an hrilhlawk avangin load la an awm lo a ni.
Kawng danna hmuna hun tawi an buatsaihah Joint Action Committee hruaitute chuan Mizoram châk lakluhna kawngpui, Vairengte to Sairang chu a that theih nan district hotute nen hma la tawh thin mah se awmzia a nei lo va, tihngaihna an hriat tawh loh avangin kawngpui dan chu an rel ta niin an sawi.
JAC Secretary Rotluanga Fanai chuan, “Mizoram sorkar leh company lamten fur avangin kawng kan siam thei lo an ti zel a, Mizoram hian kum 2022 atanga kumin 2025 inkarah fur hi kan tuar ral thak bik lo. Kawng black top-na tur hi thla tam tak, ni tam tak a awm,” tiin state dangte angin Mizoramah kawng siamtuten hnathawhna hun an neih thu an sawi.
Lirthei neituten chhiah double an pek thu leh chumi hmanga kawng tha neih an phu tih a sawi a, “Mizoram sorkar hnuaiah double tax chawi hi sorkar mi leh pawl dang an awm ve lo va, kan road tax pek pawh duhkhawp lova kan oil man lehzel min chhuhsaktu sorkar hian kawng tha min pe ve tawh rawh se,” an ti.
Home minister press conference-ah motor 360 chuangin Sairang kawng chhia a paltlang tih an hria a, chutiang motor zozaiten Aizawl thlen nan diesel tam tak an thun a, chumi atang chuan sorkarah tax tam tak an chhung lut tih an sawi a. “Khang sum zozaite kha he kawng siam nan hian rawn let ve rawh se,” tiin kawng chhiain an lirtheite a tihchhiat nasat thu a sawi.
Hetih lai hian kawng siama driver-te an hnatlang a, sorkarah chuan indaih lohna hlir an hre thin a. Kawng chhia avanga lungawi lo driver tlem te hnawt kiang tur erawh chuan sorkarin mi tam tak a tir leh thei si chu an hrethiam lo tih Rotluanga Fanai chuan a sawi a, “PWD minister pawh hmaichhana kan hmuh tumin min mutthluksan a, kan la hrethiam. National highway erawh mutthluksan lo hram rawh se,” an ti.
Hei bakah home minister pawh driver lungawi lote lakah power a show ngam ang hian Mizoram sorkar hnuaia contractor-ten an hna an tlin loh vanga Zoram mipuite leh lirthei enkawltuten an tawrhna lakah action la ve turin an phut let tih an sawi a ni.
Kawng dangtu driver-te hi chawhnu dar 1:30 vel khan police-ten rut khawmin 14 an man a, a hnu chawhnu dar 3 khan mi dang pakua an man belh leh bawk.
Kolasib district chhung hmun dang – Saiphai, Kawnpui leh Serkhan lamah chuan harsatna dang a awm lo niin thudawn a ni.
Lirthei tang hnuh chhuah tumnaah thi
Khamrang khaw bula kawng khuara lirthei lian tang hnuh chhuah tumna lamah mi pakhat a thi.
Thudawn danin, nimin chhun dar 12 vel khan Sairanga dah tur cement phur (UP51-AT/4242), lirthei ke 12 nei khalhtu, Dipankar Gogoi (36) s/o Juren Gogoi, Guwahati, chuan kawng lakah a thianpa, lirthei ke 12 nei tho a ruaka chhuk lam kawng khuara tang chu hmuin, hnuh chhuah tumin a pui a. A pawh chhuah zawh mai loh avangin lirthei khalhtu hian hand brake pawt lovin a hnuhna hruai phelh tuma lirthei leh lirthei inkara a awm laiin, a lirthei hi a lir thut a, a lu-ah a chilh ta a ni.
An chetsualna hmun hi kawng chhe pelh tawh hnu ni mah se, Nilaini zana ruahsur avang khan a nal a, chumiah chuan tlanchhuak zo lovin a tang a ni.
Chhiat tawh thu hriat a nih veleh Kawnpui police hriattir niin vanduaina thlenna hmun hi an pan nghal a. Lirthei leh a ruang hi lo lak sawn tawh a ni a. Mita hmutu dang an awm loh avangin ruang an lo dah sawnnaah hian policethlen hun nghah a ni.
Police an thlen hnuin tihfel tur tul an neih angte tifelin Kawnpui PHC-ah Dipankar Gogoi ruang chu post mortem tura phurh nghal a ni a. He thu buatsaih laiin a ruang la turin a chhungte hian Kawnpui an pan mek a ni.