Uganda-a an khawpui, Kampala leh hmar lam khawpui, Gulu inkar kawngpuia lirthei eng emaw zat insutna thlengah mi 46 vel an thi tih police-in an sawi.
Lirthei chesualna hi an rama Thawhlehni zan lai (India-a zing dar 02:30) pelh hnua Kampala atanga km 263 vela hla, Kiryandongo khaw bula thleng niin intawk zawka tlan buse pahnihin truck leh car lehpelh an tum ve ve vanga thleng a ni.
Police hian a tirah chuan mi 63 an thi tih an sawi a; mahse, a hnua en chian hnuah a zat hi an sawi tlem leh ta a ni.
“Bus pahnihte hi lirthei dang lehpelh an tum laiin an hma zawng takin an insu a ni,” tiin Uganda Police Force chuan X-ah an tar lang.
Police hian thil thlen dan chiang zawk chhui mek zel a nih thu an sawi a, lirthei khalhtu zawng zawngte chu kawngpuiah fimkhur taka tlan tura ngenin hlauhawm tak leh fimkhur lo taka mi lehpelh tum ang chi chu ti lo hram turin an ngen a, “Hei hi kan rama lirthei chetsualna thlenga a chhan tam ber a ni,” an ti.
A hnua thuchhuah an siam zuiah police hian thi zat hi a tirah an sawi tam a, chhanchhuah hna thawha hma lak a nih hnuah a chiang zawk an hriat belh leh thei ta tih an tar lang bawk.
“Chetsualna a thlen rual khan a tuartu tam tak kha nikhawhrelo an ni hlawm a, an zinga thenkhat thi anga chhiar an lo awm palh nual a ni,” an ti.
Kampala-Gulu Highway hi Uganda-a kawngpui lun ber pakhat niin an khawpui leh an ram hmar lama khua leh khawpui lian tlawhpawhna kawngpui ber a ni.
Red Cross thupuangtu, Irene Nakasiita-i chuan tun tum chetsualna thlenga thi zat hi an tam zual niin a sawi a, tam tak hi thisen chhuak nasa leh an ruh pawh tliak nasa an ni hlawm tih a sawi.
Thlalak darh vel pawh en hrehawm tak a nih thu a sawi a, ‘a nghawng pawh a na hle’ tih a sawi bawk.
Uganda-ah hian kum 2024 khan police chhinchhiah danin lirthei chesual avangin mi 5,144 an thi a. Kum 2023-ah 4,806 leh 2022-ah 4,534 niin a pung zawngin a kal mek a ni.