Aizawl: Dampa bial by-election neih tura hming pe lut mi pangate zingah inhnukdawk an awm lo a. He inthlana candidate zingah Indian National Congress candidate John Rotluangliana a hausa ber.
November ni 11, 2025-a Dampa bial by-election neih tura candidate hming pe lutte tan October ni 24, 2025 hi inhnuhdawh theihna hun tawpni a ni a. He hun tawpniah inhnukdawk an awm lo a. Heti hian, Dampa bial by-election chuh turin he inthlanna neih tur Returning Officer Malsawmzuala chuan John Rotluangliana, Indian National Congress; Lalhmingthanga, Bharatiya Janata Party; Dr. R. Lalthangliana, Mizo National Front; Vanlalsailova, Zoram People’s Movement leh K Zahmingthanga, Mizoram People’s Conference te an nih thu a tar lang.
Hetih lai hian, he inthlanna neih tura candidate mi pangaten an chanchin kimchang (affidavit) an tar lanah John Rotluangliana, Dawrpui veng a hausa ber a. INC candidate hian sum fai Rs. 4,00,000 bakah bank hrang hrang, saving leh lirthei bakah tlereuh a neih zawng zawng belhkhawm chu Rs. 1,29,12,502.18 a ni a. A nupui rohlu neih zawng zawng belhkhawm chu Rs. 7,64,811.91 a ni.
Dr. R.Lalthangliana, Kanan veng chuan sum fai Rs. 2,00,000 bakah bank hrang hrang, mutual fund, lirthei bakah tlereuh a neih zawng zawng belhkhawm chu Rs. 99,35,189.25 a ni a. MNF candidate nupui rohlu neih zawng zawng belhkhawm chu Rs. 1,31,34,097.89 a ni.
Vanlalsailova, Dawrpui veng chuan sum fai Rs. 2,00,000 a neih bakah bank hrang hrang, lirthei bakah tlereuh a neih zawng zawng belhkhawm chu Rs. 61,31,136.99 a ni a. ZPM candidate nupui rohlu neih zawng zawng belhkhawm chu Rs. 3,47,990 a ni bawk.
Lalhmingthanga, West Phaileng chuan sum fai Rs. 19,50,000 a neih bakah bank hrang hrang leh lirthei nen a sum neih zawng zawng belhkhawm chu Rs. 25,65,662.58 a ni a. BJP candidate nupui sum leh bank-a pawisa awm zawng zawng belhkhawm chu Rs. 5,87,740 a ni bawk.
MPC candidate K. Zahmingthanga, Sakawrtuichhun hian sum fai kawl a nei lo a, bank-ah Rs. 54,000 neiin a lirthei neih pakhat nen belhkhawmin a thil neih neih zawng zawng belhkhawm chu Rs. 1,54,000 a ni bawk.