Aizawl: Art & Culture Minister C. Lalsawivunga’n Falkawn, Zokhuaa Live Museum chu Inrinni khan a hawng.
Art & Culture Department buatsaih Live Museum hi Zokhua kawtchhuata Sekawtrawlhah kawi hrui sat chatin minister hian a hawng a. Live Museum buatsaih a ni chu hlu a tih thu leh thangtharten pipute khawsak dan leh nunphung an hriat thar nan te, tual chhung mite leh thalaite tana sum lakluhna hnar atan te, zin miten Mizo kutchhuak an hmuha an lei theih nan leh Mizo nihna leh hnam zia an zir theih nan a pawimawh thu a sawi a. Ei leh in pawh Mizo taka buatsaih a nih a, Live Museum chu tihchangtlun a nih chhoh zel a beisei thu a sawi.
Live Museum hawnna inkhawm hi Art & Culture Department Secretary Zodingpuii chuan a kaihruai a. Falkawn khuaa NGO hrang hrang – YMA, MHIP, MUP atanga thlan chhuahte leh Lenkawl Cultural Club-ten hmanlai Mizo khaw nun dan an entir a ni.
Inkhawma tar lan danin Art & Culture Department chuan October 25, November 1, 8 leh 15, 2025-ahte hian Live Museum buatsaih phawt a tum a, a tul dan azira buatsaih chhunzawm zel tur a ni.
Live Musuem hi state pawn atanga khualzin lut an pun belh zel avang te, tual chhung mipuite local tourism-ah an thanharh thar zel avangtein an en tur leh chhim theih tur chuan Mizo culture leh tradition chawi lar zel nan buatsaih a ni.
Mi pakhat tan Rs. 100 chawiin a chhim theih a; show hi hun hnihah then niin Mizo nun dan chi hrang hrang entir thin a ni dawn a ni.