- Vanhmingliana (Taua), Dawrpui
Ni 19, October 2025 zing ni chhuak êng mawi tak mai dawng tura ka chhuak chuan thil hmuh ka nei a, chu chuan ka hmuh than hle pawh ni se, han aù chhuah leh duhna rilru min put thar tir leh a.
Ka hriat ve chinah ngawt pawh kum 30 dâwn chu ka dam phawt a, ka hman anih chuan kawngpui dungah darkar khat tal kea kalin ka hun ka lo hmang ve ta. Hmanlai deuha ka hmuh thin chu zurui, zanlam zu in tlaivar, intibuai tih te a ni. Kum 10 dâwn lai chu damdawi inchiu leh indîl tlan kual velin a thlâk ta a. Hemi zing, a hmaa ka han sawi takah zet hi chuan Sunday – Police leh duty te awm loh lâwm a lo fuankhâwm, drugs addict mi 50 rual dâwn zet mai State Transport kawt atanga Vanapa Hall leh a piah thlengin an lo phu mur mur mai le! Dodâltu nei lo an ni tih hriain, pawisa inpe mêk, a bula inchiu mêk, nula la naupang tak tak leh tlangval, pa deuh thleng pawh an ni hlawm. Ram hmangaihtu, Hnam vei ve tu inti tan chuan rilru a va na kher em!
Ruihhlo duh mi:
Hnam azawngah hian Mizote hi Ruihhlo duh ber kan ni hial âwm asin. Zû te leh drugs te hi chu mi hnam pawhin an duh ve tho kan ti mai thei, sahdah, khaini, kuhva, meizial, dendrite, Shikhar leh Gurkha product chi hrang hrang khawih leh hmangsual tam ber kan nih a rinawm. Hêng hi vai hnam chhe ho – mutia tih vel loh chuan an khawih ve loh te an ni. Chutiang ang lek nih chu kan duh em ni?
Zû leh damdawi:
Zû hi khawvel hnam zawng zawngin an nei vek a, a factory leh zu pawh nei tha hlei hlei an ni. Keini Mizote zu in, darkar 24 in ang hi chu an ni ve lo. Drugs pawh a tam tho, a ngah hlei hlei an ni. Heti em em hian khawlaia inchiu, kawngsira mu mai mai an awm kan hre lo. Khuh damdawi takngial pawh buaipui hnam, nachhawkna pawh puar khawp a hmawm vak vak duh mai hi an awm lem lo. Engatinge Mizo Kristiante hian ti em em a ruihtheih hi kan lawm bik le?
Kan mawhphurhna:
Tumah hi indem tur kan awm lova, insawisêl thei pawh kan ni hek lo, a dem tur ber chu heng suala min kai lût tu ‘Hmelmapa Setana’ hi a ni mai.
Kan nun a tihbuai tak lutuk avang leh rûkrûk, inthahna a tam tâk lutuk ah chuan vengchhunga mi tlawmngai te’n hma lain an duty a. Khawtlang, unit hrang hrang te’n thawh khawmin tlangval te an han ruai ve bawk thin a, a bik takin Dawrpui vengah. Heng hi hna leh eizawnna tak tak anih loh avangin rei daih thei thil a ni lo. Man, vuak, hrem, tântîr hian heng mite hi a tidam thei chuang lo. A bûaltuin a bual ât avanga thih ngam lu pu an ni tawh, tihdanglam an nih loh chuan thih thlenga bansan thei tawh lote an ni.
Mi ramah pawh an awm ve tho va, nimahsela anni chuan a buaipui dan an ngaihtuahin an Sawrkar pawhin an tan rilru a seng nasa. Tihdan hrang hrang awm zinga ka chhiar ve pakhat chu hei hi a ni: Heng mite (Drugs abuse) Ruihhlo hmangsual te enkawl leh dahna tur bik Sawrkarin a siam. Hmun tha leh zau deuh pawh a ngai, stage hran hran panga vel laiin an thenhranga, khuah khirh tlat, damdawi leh eitur pek an ni. An dah hrang chho zel a, an harh deuh hunah infiamna lam leh hna thawh tir. An rilru leh an taksa hriselna ang zêl a stage hrana kalpui zêl; mi pangngai an nia an hriat hunah an duh anih chuan Pathian thu pawh hrilh leh kaihhruai an ni chauh. Kawng thui tak, hun tam tak sên hnuah an dam thei chauh. A kip a kawia sawina chi pawh hetah hi chuan a ni chiah lo.
Pathian thu zir tura Camping site-a vawrhluh mai chi an ni awzâwng lo – mi ang lo an ni tawh a, eng pawh an sawiin an ti hreh lo. Thlarau Thianghlim dawng anga awm te, mittui tla chunga thusawi an hreh hauh lo, mahsela hengte hi a der, a lem vek an ni!
Sawrkar hian budget lian tak a dah ve phal a ngai takmeuh. Concrete-in lianpui pui pisa a luah tur sak aiin kan ram leh hnam tân a tha zawk ang. Kawngtha leh zau pawh nei hrih lo mai ang, a chhûng a ngêt hrih tlat chuan hnah tha leh rah tha a chhuak thei lo.
Heng ruihhlo ngai ho te enkawltu tur hlawh tha tak nei leh tui leh electrict tha tak a awm a ngai bawk. Tlawmngaihna ringawta innghahna chi a ni lo. Chutiang support tur chuan NGO leh pawl tha tak tak puitu te pawh an awm ve a ngai. Vai ho te, vaichhia kan tih te pawh hi tlawmngaih a tul tak tak hunah chuan tluk loh rim nam an tam.
Ram leh hnam hi kan hmangaih tak tak anih chuan kan ram hmel hmang tihmaibâltu thil hi i ngai pawimawh hmasa ang u.
Kan ram rawn tlawhtu te hian an rama an haw leh a an thil hmuh an sawi hmasak ber tur chu, “Drugs addict an tam lutuk a, an nula tha tha te pawh mutpui mai theih an ni, pawisa pek chuan” tih hi a ni ngei ang. Khawlaia an hmuh tam ber ni miau hek!
Naupang tê tê lo thanglian chho tur te pawh hi Kohhran leh YMA angah te hian inhrilhhriatna i uar ang u; kan hnam thawmhnaw mawi tak tak nen, kan hnam lâm mawi tak tak te nen ‘Vanapa Hall ah, Lammualah’ entir châmchí mahila, a bul velah drugs addict hlir an lo virkual reng chuan kan mawi tak tak chuang hlei law nge!
“Pathianah chuan Engkim tihtheihloh a awm lo” tih hian khâr ila a tha ang e.