Aizawl: Tourism Department leh Khawhai khawtlangin an buatsaih, Mizorama la awm ngai lo, Remna Kût, Peace Fest 2025 chu ni hnih chhung Khawhaia neih a nih hnuah Inrinni khan a tiak, he hunah hian inremna sa ui tanna hun hman a ni.
Peace Fest 2025-ah hian kum 133 kal ta a Dawn Pasalthate leh Lal Nikuala khua, Chawngtlai pasalthate inbeihna hmun, Pawi thah kawn, Khawhai tlangah inremna sa ui tan a ni. Sa ui tan tur hian Myanmar Dawn khua atangin palai 30 chuang an rawn kal a, pasaltha hruaitute ve ve, Dawn Pasaltha Ralbila leh Nikuala pasaltha Chawngluta thlahten inremna hi an siam a, Pasaltha Ralbila thi pawh a thlahte hnenah pek let leh a ni a, Dawn khaw lamah an hawn hnuah hun remchang hmasa berah Aizawl museum a dah tura ruahman a ni.
Kût chhung hian programme hrang hrang – Peace concert, Nghakuai chiah leh cultural programme hrang hrang neih a ni a, naupang intihhlimna chi hrang hrang buatsaih a ni a. Peace Fest hi kum tin buatsaih tura ruahman a ni.
Peace Fest-ah hian Lalmuanpuia Punte, MLA, Adviser to CM chu khuallian a ni a, Tourism Department Director R. Lalrodingi chu khualzahawm a ni.