Aizawl: Mizoram Larsap General (Dr) Vijay Kumar Singh chuan Pathianni zing khan ‘Great Himalayan Connect: Run the Ridge -Connect the Peaks -Unite the Spirit’ tih thupui hmanga ‘Sikkim Soldierathon 2.0’ (Hill Half Marathon) buatsaih chu Paljor Stadium, Gangtok-ah telpuiin, Soldierathon-a tel mi 2,700 te chu a vai liam.
He marathon hi ‘Fitistan- Ek Fit Bharat,’ Indian Army Eastern Command leh Trishakti Corps-te tangkawp buatsaih a ni a. He hunah hian Sikkim Larsap Om Prakash Mathur leh mi pawimawh dangte pawh an tel.
Mizoram larsap chuan sipai leh mipuite inlaichinna tha siam tura Soldierathon buatsaih a ni thin chu lawmawm a tih thu a sawi a. Soldierathon buatsaihtute fakawm tiin, a tel zawng zawngte duhsakna a hlan.
Soldierathon hian sipai leh mipui, a bikin thalaite inkarah taksa hriselna chawi lara inkungkaihna tha zawk siam a tum a. Ram pumah ram tana nunna hlu tak hlantute ngaihhlutna, a bikin thalaiten an chin deuh deuh theih nana hmalak a tum a. Chhum lo chat lova 24×7 chhung ram venhim hna thawktu, inpumkhatna leh ram inrelbawl hran an nihna vawnhim kawnga hmalatu sipaite ngaihsanna leh chhuanna thinlung mipuiteah tuh a tum a ni.
Sikkim Soldierathon 2.0-ah hian marathon category thum — km 5, km 10 leh km 21-te awmin, Mizoram leh Sikkim larsap ten lawmman semin kum upa leh naupang telte chawimawina an hlan bawk.