MNF party-in Sakawrdaia YMA Inkhawmpui Lian neih zawh takah Chief Minister Lalduhoma’n Forest Conservation Amendment Act, 2023 (FCAA) chungchangah thu dik lo sawiah an puh.
MNF Legal Board Vice Chairman Lalpianfela Chawngthu chuan chief minister chu pawl thianghlim, politics rawngkai lo, Mizote tana hlu em em YMA member thalaite punkhawmna chu dawt hmanga campaign-na hmun atana hmangah puhin pawi an tih thu hi Inrinnia Aizawl Press Club-a thu thar thehdarhtute a kawmnaah a sawi.
Lalpianfela Chawngthu chuan chief minister chu a minister leh MLA-te ngei pawhin a thatna an sawipui thawm hriat tur awm miah lo, amah ngei pawhin ‘dan sakei’ tia a lo sawi thin, FCAA, 2023 Mizorama hman ve a duh leh tak thut chhan sawifiah tumna atan YMA inkhawmpui lian a hmang niin a sawi a. He inkhawmah ram dang nena inrina atanga boruaka teha km 100 chin tih FCAA, 2023-a tar lan a nih laia km 10 chin chauh anga dawt chiang tak thalai sang rual hmaa a sawi duh chu zahthlak a tih thu a sawi.
Hei bakah guidelines lo chhuakah ram venhimna changchawia central sorkarin hma a lakna turahte ‘State sawrkarah dil phawt tur a ni, state thuneihna a sang ta a ni’ tiin dawt bawk a sawi zawm leh tih sawiin, “Guidelines-ah hian state sorkarin dil tur tih reng reng a awm lo a, thuneihna tawp chu central sorkar kutah zel dah a ni,” a ti.
“FCAA duh lotute hmasawnna duh ve lo hial anga inpuhna lek lek a awm mek a. Mizoramin FCAA kan pawm (adopt) hma hian tuna kan ram hmsawnna kan hmuh zawng zawng hi thawh a lo ni tawh a ni tih kan sawi nawn leh duh a. Kan ram leh hnam himna hralh kher lo pawh hian hmasawnna hna a thawh theih a ni tih hi lo hre nawn leh turin Zoram mipuite kan chah nawn leh a ni,” tiin FCAA dodalna atana MNF-in October 29, 2025-a total bandh a huaihawt tur chu Zoram mipui zawng zawngten kan ram leh hnam tan a ni tih hria a, thlawpa tawiawm theuh turin an sawm tih a sawi bawk.