Aizawl: IPRP&S Department Minister B. Lalchhanzova chuan nimin khan department hnuaia thawktute kawmin department dinhmun, hmalakna leh hmachhawpte a sawipui.
I&PR Conference Hall, Lianchhiari Rûn-a an inkawmnaah minister chuan IPRP&S department chu mipui nena inngheng reng leh sorkar hlimthla tilangtu pawimawh tak a nih thu sawiin, hmasawn zel nana pawimawhte thawktute nena inpawhtlang taka sawihona buatsaih chuan rah tha a chhuah ngei a beisei thu a sawi.
Department-a thawktute chu ram leh hnam hmangaihna leh mipuite tana rawngbawlna rilru pua mahni zawnah theuhah theihtawp chhuaha thawk tura chahin minister chuan, Mizoram chuan anmahni lo chu midang a nei chuang lo tih inhre reng turin a fuih a. Sorkar chuan langtlang leh mawh la ngam, mipuite tluk luhna tlak inrelbawlna leh hmasawnna chhawp chhuahsak a duh tih sawiin, lungrual taka mipuite rawngbawlpui turin kalkhawmte chu a chah nghal bawk.
IPRP&S Department Secretary Betsy Zothanpari Sailo kaihhruai inkawmnaah hian I&PR aiawhin Director K. Vanlalsangi leh Jt Director Malsawmsanga ten I&PR dinhmun tlangpui leh hmalakna tura ruahmanna awmte an sawifiah a. Printing & Stationary aiawhin Benjamin Lalzama, Controller leh Er. Vanlalmuanchhana, Manager, Principal cum Project Manager ten P&S hmalakna leh hmachhawpte an sawifiah bawk.