Bay of Bengal chhimchhaka thlivir (deep depression) awm mek chu cyclonic storm-ah a insiam ngei dawn tih hmuh lawk a ni a, Cyclone Montha tia a hming vuah tur hi India chhim lamin an tuar dawn niin India Meteorological Department (IMD) chuan sawiin Thawhlehniah hian ‘hlauhawm tak’-ah a chang dawn tih an sawi.
IMD chuan Cyclone Montha hian Andhra Pradesh vaukama Machilipatnam leh Kalingapatnam inkar, Kakinada velah Thawhlehni zan hian severe cyclonic storm-a chak niin khawmual a lut dawn tih an sawi.
Andhra Pradesh, Odisha, Telangana, Chhattisgarh hmun thenkhat bakah Tamil Nadu chuan Montha hi an tuar dawn a, a hming hi Thailand-in a phuah a ni.
Andhra Pradesh pumah Thawhtanni atanga Nilaini thleng ruah tam tak sur thei dinhmun niin Odisha-ah Thawhlehni leh Nilaini, Chhattisgarh-ah Thawhlehni sur teuh thei dinhmunah a ding bawk tih IMD chuan a sawi.
Tamil Nadu leh Karnataka-ah pawh Thawhtanni leh Thawhlehniah ruah a sur rin a ni bawk.
Monthahian Bay of Bengal khawthlang hmarthlang lam panin darkar khata km 16-a chakin a kal mek a. Darkar 12 chhung a hawi zawng thlak lova kal zelin a hnuah hmarthlang lam hawiin a kal zui ang a, Thawhlehni tukah hi chuan cyclone hlauhawm takah a insiam hman tawh dawn niin IMD chuan a sawi.
Khawmual a kai lai hian darkar khata km 90-110 vela chak thlipui a luhpui dawn nia sawi a ni bawk.
Montha thawk tur avang hian Andhra Pradesh-a Board of Intermediate Education chuan Pathianni khan Thawhtanni atanga Zirtawpni thleng a thawhna tur district-ah chawlh a puang a. Heng district-te hi Vizianagaram, Visakhapatnam, Anakapalli, Kakinada, West Godavari, Eluru, Krishna, NTR, Guntur, Bapatla, Palnadu leh YSR Kadapa te an ni.