Aizawl: Central Board of Indirect Taxes & Customs hnuaia Directorate of Revenue Intelligence (DRI) leh Assam Rifles tangkawpin Inrinni khan dan phal loh foreign cigarette leh kuhva rah bag eng emaw zat an man.
Assam Rifles atanga The Zozam Times thudawn danin, DRI nen tangkawpin dan lova thil rawn lut a awm tih report an dawn bawhzuia hma an laknaah, Champhai Ruantlanga huan pakhat chhunga kudamah foreign cigarette (Far Star) bawm 60 leh kuhva rah bag 1,564 an man a. A pahniha a man hlut zat hi Rs nuai 953 man hu nia chhut a ni.
An thil mante hi Custom Preventive Force, Champhai hnenah dan anga hmalak chhunzawm turin an hlan a ni a, Mihring an tel erawh an nei lo.
Thudawn danin, dan phal loh thil an mante hi Zonunsanga (ZNS Family Garden) huan ram chhung, Champhai Ruantlanga kudam atanga man a ni. Zonunsanga hi ZPM Champhai South Block President nia hriat a ni.