Prime Minister Benjamin Netanyahu-a chuan US President Donald Trump-a rawtna anga Gaza-a inkahhai kalpui meka venhimna kengkawh zui tura ram dang sipai dah luh tumah eng ram nge an phalsak dawn tih chu an la ngaihtuah dawn tih a sawi.
Gaza-ah hian Palestinian Hamas hel pawl chuan ruahman lawk angin an ralthuam an tung duh rih lo va, Arab leh ram dangte an sipai tir lut turin an inpeih tawh em a hriat loh.
Trump-a sorkar chuan US sipai thawn luh chu an tum lo va. Indonesia, United Arab Emirates, Egypt, Qatar, Turkey leh Azerbaijan chuan ram tangrual sipai tirh luh an inhiam nia sawi a ni tawh thung.
“Kan himna hi kan thunun a, Israel hian khawi ram nge lo lut tura kan pawm chu kan la tichiang ang a, chu chu kan kal dan leh kan kal zel dan tur a ni,” tiin Netanyahu-a hian Pathianni khan a sawi.
“US hnenah pawh kan lo tiam tawh angin an aiawh liante nen tun hnaiah pawh kan sawiho a ni,” tiin cabinet thutkhawmah a sawi.
October 7, 2023-a Hamas-in an ram an beih hnuah Israel hian Gaza bei zuiin kum hnih chhung a rûn a, a luhna zawng zawng pawh an thunun.
Kar hmasa khan Netanyahu-a hian Turkish sipaite an luh a duh loh thu a lo sawi thawi tawh a. Indo chhung khan Turkish President Tayyip Erdogan-a’n Israel chet dan a sawisel fo avangin Turkish-Israeli inkar hi a tha vak lo.
US Secretary of State Marco Rubio-a chuan Zirtawpni khan ram dang sipai lut turte chu ‘Israel nena tha taka thawkho thei tur’ an nih thu a sawi a, Turkey inrawlh leh rawlh loh a sawi lo.
Rubio-a hian Gaza-a sorkar ding tur chu Israel leh an thawhpui ramte nen ruahman tur a nih thu a sawi a, Hamas a telh loh thung.
A hnuah Rubio-a hian US thuneituten UN thutlukne angin Gaza-a ram dang sipai dahna tur kalpui dan tur an sawi tawh a, Qatar-ah la sawiho leh tur a nih thu Pathianni khan a sawi bawk.
Trump-a ruahmanna anga inkahhai puan meka thil khirh ber chu Hamas-te ralthuam tuntir a ni a. Chawlhkar hnih inkahhai tawh chhung hian Hamas hian tharumin chibil helte an la bei nasa hle.
Hetih lai hian Hamas-in Gaza-a Israeli an hren thi mi 13 ruang chu an awmna la hriat theih a ni lo va. Israeli sorkar thupuangtu chuan Pathianni khan dama chhuah mi 20-ten ruang awmna hi an hre reng tih an sawi tih a sawi.