Aizawl: Chief Minister Lalduhoma kaihhruai High Level Task Force on the North East Economic Corridor te chuan Thawhtanni tlai khan online meeting an nei.
Thutkhawmah hian Lalmalsawma Pachuau, Secretary, Planning chuan high level task force-ten meeting an lo neih tawh atanga rawtna lutte behchhana report an duante a sawifiah a. An rawtna siam zingah hian Bangladesh leh NE state khawpuite inkalpawhna kawngpui lian neih chungchang te, India – Myanmar – Thailand inkalpawhna tur kawngpui chak zawka thawh te, Guwahati chu hmunpuia hmanga helicopter hmanga NE khawpuite inthlunzawmna tha zawk siam te, inland waters ways pawimawh Barak, Brahmaputra leh a dangte thuam that te, rel hmanga hmarchhak khawpuite thlunzawm a, rel service man tlawm a awm theih nana electric train hman uar te, internet service tha zawk leh zau zawk din te, border trade infrastructure din thar leh tihchangtlunnate leh hmarchhak ramte tana product branding awlsam leh market zau zawk siam te leh rawtna dang tam tak a tel a ni.
Thutkhawm hi Jyotiraditya M Scindia, DoNER Minister leh member state aiawh minister te an tel a. Nimina an sawihote nen hian final report an siam tawh dawn a ni.