Aizawl: Mizo Zirlai Pawl (MZP) General Headquarters buatsaihin MZP din champha, kum 90 tlin lawmna leh Zirlaite Ni an lawm.
Thawhtannia I&PR Auditorium-a hun hmanah, MZP President Dr. C. Lalremruata chuan hruaitu ni tawhte chu MZP kal leh zelna tur atana rilru ngaihtuahna seng thar tur leh MZP Pisapuiah pawh lawi lut tam lehzual turin a sawm a. MZP kum 90 tlin theih chhan chu hruaitu hmasate thawhrah a nih thu a sawi a. Zirlai pawl a nih angin zirna an ngai pawimawh tur a nih rualin nationalism an buaipui lo a nih chuan MZP chu engtikah mah a sang ngai dawn lo tih sawiin, “Zirna leh nationalism chu MZP innghahna, a lungphum a ni a, rualkhai taka a kal zel theih nan theihtawpa hmalak a tul,” a ti.
MZP Adviser Dr Vanlalremruata Tonson chuan Zirlaite Ni thupui, ‘Zirlaite Hmathlir’ a sawi a. MZP president lo ni tawh zinga damlai upa ber, Prof. JV Hluna (MZP President – 1977-1978) chuan hruaitu hlui aiawhin thu a sawi.
Zirlaite Ni puala thuchah sawiin Education Minister Dr. Vanlalthlana pawhin MZP din champhaphak vawi 90-na leh Zirlaite Ni pualin Mizoram chhung leh pawna zirlaite chu an zirna kawngah Pathian malsawmna an dawn zel theihnan duhsakna hlanin chibai a buk a. Zirlaite chu rilru hriselna tha tak nei tura chahin, ruihhlo leh zuk leh hmuam laka insum turin leh, zirlaite chu ram leh hnam hmakhua an nih avangin rilru leh taksa hrisel tak nei turin a chah a ni.
Inkhawmah hian kum 1935 atanga president lo ni tawhte hnenah MZP kum 90 tlin lawmna pual hian chawimawina hlan an ni. MZP President Zokailiana Khiangte, Thawhtannia boral ta sunna hun hman a ni bawk.