Aizawl: MNF Vice President Lalchhandama Ralte chuan total bandh an buatsaih tur chu MNF tan ni lo, ram leh hnam tan a nih thu sawiin, ram leh hnam chhan turin theihtawp an chhuah zel dawn tih a sawi.
Thawhtannia Hnam Run inkhawma political session-ah thusawiin Leader of Opposition ni bawk Lalchhandama Ralte chuan, “Kan hman pasalthaten kan ram leh hnam himna turin India constitution (khawvela constitution ropui ber an tih pawh) ziah that ngaiin an nawr thlu thei a. Article 371G hnuaiah kan ram, kan hnam, sakhua kal zel himna tur sa lu an rawn hawn a. Hei hi MNF tan a ni lo va, kan ram leh hnam tan a ni,” a ti.
MNF Action Committee Chairman Lalchhandama Ralte chuan, ZPM sorkarin Central duh dan leh mipuite rawn lova FCAA 2023 a pawm avangin Article 371G hnuaia ram neitu nihna a sut buai avangin, Mizo mipuite thlavang hauh total an nei dawn tih a sawi a. Buh lu chuh laia total bandh siam thu inthlahrun awm thusawiin, “Kan ram humhalh a, mipuite thlavang hauh a tulna avangin hreh tak chungin kan kaltlang a ngai a ni,” tiin, ram chhan turin Zoram mipuite thlawpna a dil bawk.
“FCAA 2023 hi kan hotute nen do tul kan ti a, sut leh a nih theihna turin Sept 3, 2025 khan Assembly Speaker hnenah special session kova ennawn leh turin kan lo thlen tawh a. Hun eng emaw chen kan ngaihchan hnuah kan ram leh hnam humhim turin Mizoram pum huap total bandh neih hi kan titlu ta a ni,” Lalchhandama Ralte chuan a ti.