Kan ram ruihhloin a eichhiat mek lakah mipuiin chhantu an zawng a, ruihhlo tirem tura penchhuah chu kan rama pawl lian ber YMA chuan kumpuan thupuiah an nei ta. Sakawrdaia khawmpui chuan kan ram hmelma ruihhlo hluar ta lutuk laka ke pen turin thutlukna an siam ta a ni.
Ngaihtuah maia thil awlsam tak anga lang, mahse khawvela sawrkar engemaw zat lo hlawhtlin theih tawh lohna ruihhlo do hi a namailo hle. Kum 2016 a thlan tlin Phillipines president Rodrigo Duterta khan ruihhlo chu namen lovin a do a. An rama ruihhlo hluar lutuk a dona lamah hian mihring nunna pawh mi 20000 chuangin an chan phah a, police leh ruihhlo zuarte an in kaphlum zawih zawih a, civil mi heti zatin an thih phah chung hian kum 2022 khan a sawrkar pawhin a tlak phah ta a ni.
Ruihhlo do hi kan then hran thiam a ngai dawnin a lang a. YMA hian uluk takin an zir hmasa turah ngai ila, khawi laiah hian nge kan beih ang a, engtianga beih tur nge tih zirna hi a pawimawh hmasa ber dawn a ni.
Ruihhlo hi kan rama siam a ni lova, dan lova ram pawn atanga lo lut a ni. A tawlh luttute hi mi hausa pui pui, vaibelchhe tel sumdawn nana hmang an nih avangin an tawh a khirh hle ang. Hemi bei tur hian kan sawrkarin nasa taka YMA te a puih a ngai dawn a ni. Silai leh ralthuam nena beih pawh a ngai hial mai thei. A supply kawng chhutchah hi hnapui hmasa a ni phawt.
A pahnihna leha pawimawh chu kan rama ruihhlo ngawl veite enkawl dam a ni. A ngawl an vei tawh a, ruihhlo ngawlvei pakhat enkawl ringawt pawh hi a khirh em em a. Kan ramah hian ruihhlo ngai hi a sang tel an awm a, heng ho hi engtin nge kan enkawl ang a, ruihhlo bawih ata kan chhanchhuah ang tih hi ruihhlo lo lut tur dan chah nen a pawimawh dan a in ang reng. Demand reduction leh supply reduction hi kan hmalakna hmasa pakhat nise.
Hengho enkawl nan hian reilote a tawk lova, kumpui linglet a enkawl ngaite pawh an awm. Heng atan hian mipui pawhin sum ka sen hreh loh a ngai a. Tin, enkawl chhuahte kal lehzelna/enkawl zuina pawh kan ngaihtuah a ngai ang. Enkawl lehzel a, an hnathawh tur thlenga buaipui an ngai thei.
Heng han ngaihtuah hian YMA te hmabak hi a ko em em. A pawimawh ber mai chu mipui support hi a ni. Sum lovin engtinmah ruihhlo hi a do theih loh a, sum sen tur lamah mipui i inhawng bawk ang u.