Agriculture Minister PC Vanlalruata chuan sawhthing lei leh hralh chungchangah thil felhlel awm chu sorkarin a chhui chiang mek tih a sawi.
ZPM-in an party pisaa chhung inkhawm, Thawhtannia an neiha thusawitu agriculture & farmers welfare minister chuan ZPM an auhla ber, thlai thar lei chu a takin an kalpui mek tih sawiin, “Tun hnaiah sawhthing lei leh hralh chungchangah thil felhlel a awm tih hriain sorkar chuan a chhui mek a, pawn lamah pawh mi thahnemngaiten tih tak zetin min lo veipui a, a lawmawm hle a ni,” a ti.
PC Vanlalruata chuan tuna chief minister Lalduhoma hian hman atang tawhin kuthnathawktute hmakhua a ngaiin a vei a, a tlangau hla ber pawh budget-a thlai thar leina dah leh crop insurance kalpui a nih thu a sawi a. Tunah hian State Level Coordination Committee on Crop Insurance an din tawh a, tender chhuah tawhin, TATA AIG General Insurance Company Ltd. an thlang fel tawh tih a sawiin, “Mizoramah Crop Insurance kan kalpui thei dawn ta a ni,” a ti bawk.
Minister chuan kuminah sawhthing rate a chhe em em a, kg khatah Rs 50-a hralh kha huphurhawm hle mah se, ZPM au hla a nih avangin tihhlawhtlin ngei tha an ti a. Chief Minister hovin meeting an nei a, an intiam ang ngeiin tihhlawhtlin tha an ti a, kuthnathawktuten an thawh rim rah an seng mek a, an lawm hle tih a sawi.