Aizawl: Central Vigilance Commission chuan India ram pumah October 27 atanga November 2, 2025 hi eirukna leh hlemhletna do kawnga mipuite zirtirna hun, Vigilance Awareness Week-ah a puang a. Thawhtanni khan Sudhir Kumar, Principal Secretary, General Administration Department kaihhruaiin Secretariat (Main Building) kawtzawlah Secretariat-a thawkten thutiam (pledge) an chham rual.
Vigilance Awareness Week, 2025 puala thuchah a tihchhuahah Chief Minister Lalduhoma chuan Mizoram chu Lakshadweep dawta eirukna tlemna berna state a nih thu a sawi.
Chief minister chuan Vigilance Awareness Week chu hrui khat vuana eirukna leh hlemhletna do tura mipuite zirtir na’na hman thin a nih thu a sawi a. Mizoram sorkar Vigilance department pawhin kum 2018 atangin kum tin he hapta hi a hman thin thu a sawi a. Chief Minister chuan eirukna chu hmasawnna daltu, mipuiten an chanvo dik an chan theih lohna bul, Pathian huat zawng a nih thu a sawi a. Mahni chhungkua theuhah eirukna do hna huai taka kalpui tur leh eirukna sum atanga lei thil reng reng duh lo ngam turin mipui a sawm.
Lalduhoma chuan eirukna laka fihlim theihna turin sorkar laipuiin a siam thu leh sorkar hnathawkte chu CSS Conduct Rules, 1964 danin a phuar thu a sawi a. Prevention of Corruption Act, 1988 hnuaiah Anti Corruption Bureau leh Mizoram Lokayukta din a ni tawh tih sawiin, kumin chhungin eirukna leh a kaihhnawih thilah ACB chu preliminary inquiry tihphalna 10 pek a nih tawh thu leh regular case siam phalna panga pek an nih tawh thu a sawi a. Transparency International leh NITI Aayog data behchhana CMS India Corruption Study-in a hmuhchhuah danin Mizoram chu Lakshadweep dawta eirukna tlemna ber state a nih thu leh thil chhinchhiah tlak leh chhuanawm tak a nih thu a sawi.