- Lalremliana Pachuau
Pu Sangzela Tlauin CM a nih laia Pu Hawla a interview tum khân, “Vawi khat pawh la sawrkar lo, ro rêlnaah pawh la tel lo hian duh duh hi an sawi a. A sawi mai chu a har lo, a taka tih erawh thu hran daih” tih tlukpuiin a sawi a nih kha. Kha mi tuma Pu Hawla thu sawi dikzia, ZPM sawrkarah, a bik takin Pu Duhoma-ah hian kan hmu ta mawlh mawlh mai a nih hi.
Kawng an chhe tak tak mai chu, inthlan hmaa Pu Duhoma’n kawngpui tlo siam dan tur a sawina video kan hmu nawn chhen ta mai a. Êng kan nei zing bawk a, inthlan hmaa tui a khuah dan tur leh, ênga intodelhna kawng an zawh dan tur a sawina video kan hmu mawlh mawlh bawk. Chutiang zelin an sawrkar huna thil tha tih an tum dan, a theory mai chuan a aia tha awm leh thei tawh lo tur ang a sawina hrang hrangte kha kan lo hmu chamchi ta mai a nih hi.
Mahse, sawrkarna an han changin ro an han rêl ta chiah a. Pu Hawla thu sawi dikzia a lo lang ta a nih hi. Tun thleng hian a kalna hmun apiangah Pu Duhoma hian, a duhthusam (dream) leh a hmathlir (vision) sawi nuam a ti êm êm a. A châng leh van ruah tui khawlna a sawi a, a châng leh tui khuah a sawi bawk. Duhthusam hrang hrang sawiin a phi ruai a, mahse a tak ram erawh hmuh tur a vâng si a nih hi. Mipui thinlung hneh tum luatna avangin, Pu Duhoma hian thu ngaihnawm tak tak min fah mawlh mawlh mai a nih hi!
Mahse, a tak ramah erawh chuti maiin thil tih a lo awlsam si lohzia, a sawrkar kal danah kan hmu ta a nih hi. Mahse, Pu Duha hian hei hi hre reng chung siin kalsan, sim a tum der lo niin alang. ZPM hian thil tha tih an duh tih phat rual a awm lo. Thil tha tak tak pawh an ti ngei e. Mahse, mipui atanga ZPM sawiselna thawm lo ri chhuak reng maite hi, a chhan an awm avang chauha lo ri chhuak an ni tlat.
Tin, ka beisei loh lutuk thil ka hmu mawlh mawlh bawk. Chu chu hei hi a ni – Pu Duhoma’n dawt a sawi nasa lutuk! FCAA chungchanga a thu sawi pahnih inkalh tlat te, Shillong Accord, India leh Nagaland rammute inremna, MNF leh India inremna anga a han sawi ngam ngatte phei kha chu, a huaisâr thlak lû deuh a nih kha! Video lamah he thu a sawina hmuh tur awm lo tal se chuan, ngaihnathiam pawh a theih deuh tur hi a ni a. Hei baka a dawt sawi tam tak, video proof nen lama Opposition Facebooker lamin an tar lan zozaite hi, ngawihpui reng chi a ni tawh lo.
Tuna a lan danah, ZPM khân Pu Duhoma tel lovin inthlan kha lo hmachhawnin, entir nân, Dr Mathlana emaw Pu K. Sapdangate ang hi lo CM ta zawk se chuan, tun ai hian ZPM hian nasa takin kan ram hi an hruai tha zawk ngei ngei ang tih a rinawm em em a nih hi. Hetiang thu ziah a ngai leh thin hi a lungchhiatthlakin, a ninawm zozai tawh a. Mi ramin hma an sawn duai duai laia, kan tawlhna ngaia kan tawlh reng mai hi, a manganthlak teh zawng a nih hi.
Mihring nihna dik tak i hriat duh chuan, a kutah thuneihna (power) pe rawh tih dikzia kan hmu mek a nih hi. Tin, Pu Duhoma’n Dept sum tamna, CMO chanpuala a siam dan zawng zawng, Works Dept chanvo a khawih danglam dan, Finance Minister a nihna anga thuneihna a pumbilh dan zawng zawngte hi, a mak a ni ber e. British histawrian ropui Lord Acton-a’n Bishop Mandell-a hnena lehkha a thawnah, “Power tends to corrupt, and absolute power corrupts absolutely”tia a ziak kha Pu Duhoma-ah hian a thleng dik tak zet a lo ni e.